I&PR Minister Lalruatkima chuan tunhnaia Chief Minister Zoramthanga’n boruak hralh chungchang a sawi chu khawvelin environment chhe zel a buaipui mek lai hian Mizo-rama mauten carbon an eiral nasat dan leh Carbon Credit Scheme hmanga sumdawnna (boruak hralh) kawng a awm theih dan chu hman aṭanga a tuipui tawh thu a sawi.
Ningani aṭang khan Lalruatkima hian Mizoram hmar tlangdung tlawhin Sinlung Hills Council inthlan atana elec-tion campaign neiin, khaw hrang hrangah vantlang inkhawmah thusawina hun a hmang a, hun rei tak Sinlung Hills Development Council kalpui a nih hnuah Sinlung Hills Council hnathawk tak tak thei tura inthlanna hmachhawn a lo ni ta chu hmasawnna ropui a nih thu a sawi a, SHC Secretary tur pawh ruat fel a nih tawh thu a sawi bawk.
Lalruatkima chuan tunhnaia Amazon ram kâng avanga khawvel mangan dante, Parliament training-ah pawh parthi aia thingphun tur an dawn ṭhin thute, New York UN Office kalkawngah mau an phun thu te a sawi a, Mizoram chu boruak chhia eiral thei mau tamna a ni tiin, thing hmun hectare 4 leh mau hmun hectare 1 a inhen avangin Carbon Trading chu tuipui tham a ni a, hi hi kan CM pawhin boruak hralh a sawi chhan chu a ni, a ti bawk.
Lalruatkima chuan Chief Minister chu vision thui tak nei, mite hmuh loh hmu phak, vision nei ṭha nih thu a sawi a, hetihlai hian chief minister hlui chu vision pakhatmah nei lova hun rei tak Mizoram lo kaihruai tawh a nih thu a sawi a, Missionary nuai khat tirh chungchangah Lalruatkima chuan Kohhranten `1,000/- zela missionary pakhat an sponsor thei a nih chuan Mizoram economy ṭhang chho zelah missionary nuai khat tirh chu thil theih a ni, a ti a. mi ṭhen-khatin sawrkar sum harsatna an sawi ṭhin chungchangah, a Department Rural Development-ah chauh pawh tunhnai khan cheng vbc tam tak sanction a nih thu a sawi a. Mi rethei in sakna – PMAY (G) atan kum 2016-17 atan second installment hmuh a ni a, beneficiary 4000 tan Central-in pawisa pek an tum thute, DRDA thawktu hlawh tur cheng nuai 195, NREGA atan cheng vbc 233 leh Material component atan cheng vbc 52 hmuh a nih thute a sawi bawk.