District Bawrhsapin Swadhar Greh hawng

MHIP Sub-Hqrs. Serchhip enkawl Swadhar Greh (Thlamuanna In) chu Serchhip IOC vengah District Bawrhsap Sangchhin Chinzah chuan nimin khan a hawng.

Sanghmingliani, President, Sub-Hqrs. MHIP Serchhip kaih-hruai Swadhar Greh hawnna inkhawmah hian District Bawrhsap chuan thusawiin Serchhip District chu hmeichhe tamna a nih avangin hmeichhia harsatna tawk ṭanpuina hmun hi a mamawh a, chutih rualin hetiang hmuna enkawl ngai hi tam lo se, a ti a, in chhung-khurah nu an pawimawh tih sawiin, khawtlanga sualna pun-lun zel tur venga tidanglam turin nute an pawimawh hle a ni a ti.

R.Lalbiakliana CDPO Serchhip pawhin thusawiin, hmeichhiate tana sawrkar laipui hmalakna hrang hrang leh Swadhar Greh kalpui dan te leh hna a thawh dan te a sawi a, R.Sathya Sundaram, SP Serchhip, PC Lalṭanpuia Addl. SP Serchhip, R.Changliana, Sr. Adviser, MUP District Hqrs., Serchhip leh R.Lalhmunsiama, Treasurer Sub Hqrs.YMA ten thu sawiin, Buangpui leh Hmar Veng Br MHIP ten Swadhar Greh a hman tur thilpek an hlan nghal bawk a ni.

Swadhar Greh hi sawrkar laipuia Ministry of Women & Child Development hnuaia kalpui niin, Mizoram District hrang hrangah NGO enkawlna hnuaiah din a ni a, Serchhipah hian MHIP Sub Hqrs Serchhip chuan an enkawl dawn a, he hmunah hian hmeichhia, tihduhdah tuarte enkawl tur niin, managing board din a ni a, thawktu mi 5 bakah Visiting Doctor 1 lak fel tawh a ni a, kumin August ni 1 aṭang khan K.Chawiliana Building, IOC Vengah kalpui ṭan a lo ni tawh a, khum 30 awm tur a ni a, an case a zir in kum 5 thleng an awm thei dawn a, hemi chhung hian an ei leh in leh an mamawh-te tumsak vek an ni ang.