Categories
Chanchinthar Mizoram

Dy. CM-in Kolasib Sports Complex a hawng

Nimin khan Deputy Chief Minister, UD&PA Minister ni bawk Tawnluia chuan cheng nuai 2268.43 senga sak Kolasib Sports Complex, Project Veng, Kolasib ami chu a hawng a, bialtu MLA leh Minister ni bawk K.Lalrinliana, Sports & Youth Services Minister Robert Romawia Royte, MLA C.Lalmuanpuia leh Lalrinsanga Ralte bakah Zodintluanga Ralte te an tel a ni.

Sports Complex hawnna inkhawm buatsaih ah Deputy Chief Minister Tawnluia chuan thusawiin, Kolasib Sports Complex sa tura project bul tantu UD&PA Minister hlui Zodintluanga Ralte in Kolasib Sports Complex hawnna inkhawm a telpui thei chu lawmawm a tih thu a sawi a, a hmawrbawktu a a tang thei chu vannei a intih thu a sawi a ni. UD&PA department chuan infiamna ruhrel siam kawngah thalaite hmakhua ngaiin hma a la chhunzawm zel dawn a ni a ti a, infiammite hnenah ngenna siamin, an hmasawnna tur leh an hlawhtlin theihna turin sawrkarin ruahmanna hrang hrang a siam sak a, a la siam sak leh zel dawn bawk a, heng an puala hmanrua leh thil chi hrang hrang duhsak taka an buatsaihsak te hi dimdawi tak leh fimkhur taka enkawl a, a nihna ang taka hmang tangkai tura an rilru, ngaihtuahna leh thahrui seng tura chahin hreipui khuai tu thei pawh tha sen a ngai zel angin tumruhna, taimakna leh Pathian tihna nen theihtawp chhuah turin a chah a ni.

Sports Minister Robert Romawia Royte pawhin Kolasib mipuite lawmpuina thu hlanin India sawrkarin sports a ngaipawimawh thar em em a, national Education Policy tharah phei chuan sports hi curriculum pakhat angin a telh dawn a, school tinah subject khat angin a awm tawh dawn a, Mizoram sawrkar pawhin nasa takin tan lak a tum a ni a ti a. Tunah hian Mizoram a football ground hrang hrang 13 chu phullem phah tura ruahmanna siam fel a ni tawh a, a dang pawh tih belh zel turin hmalak mek a ni a ti a. Mizoram State Games inbuatsaihna pawh tluang taka kalpui zel a nih thu sawiin infiammite leh infiamna lama tui zawng zawngte a hlawhtlin nan theihtawp chhuah turin a sawm a ni.

Nimin chawhma khan Deputy Chief Minister Tawnluia hian Regional Sports Training Centre, Kolasib Saidan-ah Sports Authority of India (SAI) Centre lungphum a phum a, Kolasib Saidan-a SAI Centre hi Mizoram Sawrkar leh Sports Authority of India tangkawp hmalakna a ni a. Ministry of Youth Affairs & Sports in Khelo India Scheme a siam kaltlanga hmalak niin cheng vaibelchhe 5 senga football petna tur phullem phah phalna pek a ni a. June ni 1 khan hnathawh tan niin underground drainage siam zawh tawh a ni a, phullem phah tur pawh Kolkata atanga rawn thang mekin ruahman dan chuan nakum January ni 31 hma a phah zawh vek tum a ni.
He Centre hi India rama Sports Authority of India in football academy pahnih a neih zing ami a ni a, he hmuna zirlai awmte enkawlna senso zawng zawng sawrkar laipuiin a tum dawn bakah coach thiam bik sawrkar laipuiin a rawih ten an enkawl bawk ang.

By Editor

C.Lalrochhuanga,
New Serchhip, Serchhip - 796181
Mizoram
Contact: WhatsApp | Phone Call | Telegram

Leave a Reply

This site uses Akismet to reduce spam. Learn how your comment data is processed.