Euro 2020 khel thei tur a hriat chhoh zel a, Inrinni khan Germany, the Netherlands, Croatia leh Austria-te chuan Euro 2020 khel thei turin an dinhmun an tichiang leh a, hemi hma hian England chuan Ningani khan an dinhmun an tichiang tawh bawk a ni.
Heti hian Euro 2020 khel thei turin ram 16 an tling chiang tawh a, hmunruak 8 la awm chu an la inchuh a, nizan khan ṭhenkhat chu a chiang leh dawn a ni.
Group-A aṭangin England chu group winner niin an tling chiang tawh a, Czech Rep. pawhin 2-1-a Kosovo hnehin an tling tawh bawk.
Group-B-ah Ukraine chu group winner an ni a, Champion lai Portugal hian nizan khan Luxembourg an hmachhawn a, an chak chuan an tling chiang dawn a, hetihlai hian an chak loha Serbia-in Ukraine an hneh hlauh chuan Serbia zawk hi an tling dawn a, Serbia hi Portugal aiin point 1-in an hniam a ni.
Group C-ah Germany bakah Inrinni zana 0-0-a Nothern Ireland draw-tu, the Netherlands-te an tling chiang tawh a, N.Ireland hian nakum March thlaah play-off an la khel thei dawn a ni.
Group D-ah hian an dinhmun a la chiang lova, Denmark (15 pts.) leh Switzerland (14 pts)-ten qualify turin an match hnuhnung berah draw chiah an mamawh a, hetihlai hian an match hnuhnung berah Republic of Ireland-in Denmark an hneh hlauh chuan Rep.of Ireland (12 pts.) pawh hian chance an la nei thei dawn thung a, Switzerland-in Gibraltar an draw ve a nih phei chuan an pathum aṭangin head-to-head-a ṭha thlan a ngai dawn a ni.
Group E-ah Croatia an tling chiang tawh a, Wales (11 pts) chuan Inrinni zana 2-0-a Azerbaijan an hneh avangin automatic qualify an la beisei thei a, an match tawp berah anni aia point 1-a sang Hungary (12 pts.) an hneh chuan an qualify thei dawn a, hetihlai hian an chak zo lo emaw, an draw emaw a nih hlauh chuan anni aia point 1-a hniam, Slovakia (10 pts.) tan hun ṭha an hawnsak ve thung dawn a ni.
Group F-ah Spain leh Sweden an tling chiang tawh a.
Group G-ah Poland leh Austria-te an tling tawh bawk.
Group H-ah France leh Turkey an tling chiang tawh a, Iceland-in play-off an khel dawn bawk.
Group I-ah Belgium leh Russia an tling chiang tawh a, Scotland-in play-off an khel ang.
Group J-ah Italy an tling chiang tawh a, Finland chuan a vawi khatna atana major tournament khel thei turin Zirtawpni khan an dinhmun an sawhnghet bawk a ni.