Euro 2020 khel thei tur ram 20 a hriat ta

Euro 2020 Qualifying thawhkhatna chu khelh zawh a ni ta a, Thawhlehni zan khan Wales chuan Hungary hnehin automatic qualificatio hmanga Euro 2020 khel thei 20-na an ni ta a ni.

Ryan Giggs pawlte hian Aaron Ramsey goal hnih thun hmangin Hungary hi 2-0-in an hneh a, Group-E aṭangin England nen an tling ta a, heti hian Euro 2020 khel tura tling chiang tawhte chu – Austria, Belgium, Croatia, Czech Republic, Denmark, England, Finland, France, Germany, Italy, Netherlands, Poland, Portugal, Russia, Spain, Sweden, Switzerland, Turkey, Ukraine leh Wales-te an ni ta a ni.

Anniho bakah hian nakum March thlaah play-off hmangin Euro 2020 khel tur hi an awm belh leh dawn a, play-off khel tur te chu – Belarus, Bosnia-Herzegovina, Bulgaria, Georgia, Hungary, Iceland, Israel, Kosovo, North Macedonia, Norway, Northern Ireland, Republic of Ireland, Romania, Scotland, Serbia leh Slovakia-te an ni dawn a, November ni 22 hian play-off-a an inkhelh dan tur hi siam a ni ang a, anniho zinga ram 4 hi Euro 2020 khel thei tur an ni leh dawn a ni.

Euro 2020 khel tura tlingte hi an ranking a zirin ram paruk zelin Pot 4-ah ṭhen an ni dawn a, Pot tina ram pakhat ṭheuh zel la chhuakin Euro 2020 atan Group 6-ah ṭhen an ni dawn a, Pot 4-a ṭhen dan tur chu –

Pot 1: Belgium, Italy, England, Germany, Spain, Ukraine

Pot 2: France, Poland, Switzerland, Croatia, Netherlands, Russia

Pot 3: Portugal, Turkey, Denmark, Austria, Sweden, Czech Republic

Pot 4: Wales, Finland, Play-off A, Play-off B, Play-off C, Play-off D