Health Minister-in HIV/AIDS chungchang Kohhran hruaitute a sawipui

Health and Family Welfare minister Dr R Lalthangliana chuan Mizo zingah HIV/AIDS hluar nasa chu ngaihthah chi a ni tawh lo tih sawiin, he natna laka invênghim tura infuihtharna lam uar turin Mizoram Kohhran Hruaitu Committee a ngen.

Health Minister hian Mizoram Government Doctors’ Association hruaitute a kawm hnuah nimin khan Mizoram Kohhran Hruaitu Committee chu kawm ve leh nghalin, HIV/AIDS hluar lutuk chungchang hi a sawipui a, he hunah hian MSACS hotute pawh an tel a ni.

Dr. R. Lalthangliana chuan mipui hriselna dinhmun chu ṭha thawkhat hle mahse HIV/AIDS hluar chho zel erawhin ngaih a tiṭha thei tawh lo a ni a ti a, a invênna tura inzirtirna uar taka kalpui a pawimawh hmasa tih sawiin, kohhran hruaitute pawhin ngai pawimawh se a duh thu a sawi a ni.

MSACS Director Dr. Lalthlengliani tarlan danin nikum 2018 khan HIV/AIDS case 2557 an hmuchhuak a, heng zinga 843 hi Aizawl district chhunga mi an ni nghe nghe a ni.

Mizoramah hian nitin positive 9 hmuhchhuah anga chhut a nih thu MSACS chuan a chhinchhiah a, a kai te hi kum 25 – 34 inkar an ni tlangpui a ni.

MSACS chhinchhiah danin kum 2006 aṭanga March 2019 thlenga HIV+ an chhin-chhiah zinga zaa 67.21 chu mipat hmeichhiatna hman aṭanga inkaichhawn a ni a, zaa 28.12 chu ruihhlo ngai te inchiuna atanga inkaichhawn a ni.

National AIDS Control Organization (NACO) in kum 2017-a data a siamah ram-chhunga cheng zawng zawng zinga zaa 0.2 an positive laiin Mizorama cheng zawng zawng zinga zaa 2.04 chu HIV positive an ni a, hei vang hian Mizoram chu HIV/AIDS kai tamna ber state a ni a, pahnihna Manipur ah zaa 1.43 in an vei a, pathumna Nagaland ah zaa 1.15 in an vei a ni.

Leave a Reply

This site uses Akismet to reduce spam. Learn how your comment data is processed.