IGNOU, Mizoram Regional Director, Dr. S.R. Zonunthara chuan IGNOU, Mizoram Regional Centre hnuai aṭanga zir chhuakte hna zawnpuina atan Campus Placement neih tumin hmalak mek a ni tih a sawi.
Nimin chawhma dar 11-a Govt. Serchhip College IGNOU Study Centre 1914-a Induction Meeting neih a hmanpuinaah Dr. S.R. Zonunthara chuan he thu hi sawiin, IGNOU chu Central University niin, kum 1985 khan parliament-a pass-in din a ni tih a sawi a, IGNOU-in a tum ber chu zirna in pangngaia kal thei tawh lote tan remchang siamsak a, a mahmawhtuten zirna sâng zawk an zir zel theihna tura din a ni tih a sawi a, zirna pangngaia an bungruate chu an hman loh hun, an chawlh ni-a lo hman ṭangkai chu a tum a ni tiin, zirna pangngaia kalte an chawlh hunah IGNOU zirlaite chu councelling neihpui ṭhin an ni tih a sawi.
Regional Director chuan tunah hian India ramah Regional centre 67 awmin, Mizoram Regional Centre hnuaiah Study Centre 43 a awm tih a sawi a, IGNOU-ah hian Schedule Tribe leh Schedule Caste-te tan Bachelor degree hnuai lam zirna a thlâwn vek a ni tih sawiin, zirna pangngai bakah hnazawnna atan leh eizawnna atana ṭangkai tak tak Certificate leh Diploma course engemawzat zir tel tur a awm tih a sawi bawk.
He hun K.Laldinpuii, Coordinator, IGNOU Study Centre-1914 kaihhruaiah hian PC Lalremsiama, Principal, Govt. Serchhip College pawhin thusawiin, Distance education-ah chuan IGNOU aia ṭha India ramah a awm lo tih sawiin, IGNOU zirna standard chu a hniam lova, chuvangin India ram hmun danga hna zawn kawngah pawh IGNOU zirlaite chuan thlan an hlawh fo tih sawiin IGNOU-a zirlaite chu inngai hniam lo turin a chah a. PC Lalremsiama chuan khawvel ram dangah pawh IGNOU chu a inzar darh tawh a, mi tam takin an hna-a ngheh nan leh kaisanna atan IGNOU chu an hmang ṭangkai tawh tih a sawi bawk.
32nd Convocation 2019 report-a a landanin, India ram pumah IGNOU-ah hian zirlai inziaklut 30,93,583 an awm a, course/programme zir theih 241 awmin, India ram pawnah study centre 12 an nei a ni.
Tun dinmunah Mizoram Regional Centre hnuaiah Study Centre 43 awmin, Academic Councellor 152 an awm a, zir theih (programme offer) 64 awmin, zirlai hi 20,000 vel an nei a, July 2019 session-ah zirlai thar 5,062 an nei a. Serchhip Study Centre hnuaiah bik hian kuminah zirlai 389 an awm mek a, tunah hian January, 2020 Session atan admission hawn mek a ni.
He hunah hian IGNOU zirlaite leh tualchhung thuthar lakhawmtute an tel a ni.