I&PR Minister-in Lungkawlh Branch YMA Platinum Jubilee hmanpui

Nimin khan Lungkawlh Community Hall-ah Lung-kawlh Branch YMA kum 75-na (Platinum Jubilee) champha lawmna buatsaih a ni a, Lalruatkima, Minister of State, I&PR, RD, etc chuan khuallian niin a hmanpui.

Nimina Jubilee lawmna inkhawm CV Lalrengliana, President, Branch YMA kaih-hruaiah hian Minister chuan Lungkawlh khawtlang, khaw hlun leh upa tak, kum 150-na lawm mai tura inpuahchah mek chu Rural Development Department chuan nasa takin a vur dawn tih a sawi a. Border Area Development Fund (BADP) sum hmangin |iau lui panna kawngte, huan lo ram panna kawngte, khaw chhunga school building tharte, tuikhur-te leh thil dang ruahmanna engemawzat a awm a, in nihlawh hle a ni, a ti a. YMA lo din ṭan dan leh a lo din chhan-te, khawtlang tinin vawiin thlenga kan ṭangkaipuizia te sawiin, YMA chu Mizoten nei lo ila kan ram dinhmun chu a chhe hlea a rin thu a sawi a, YMA tel lo chuan chhiat ni leh ṭhat nia mahni intuamhlawm zo lo chhungkua tam tak kan awm hialin a rin thu a sawi bawk.

Minister chuan YMA te chu roreltu tur an ni tih sawiin, roreltute ṭha taka thawhpui chunga ram leh hnam humhalh tur an ni, a ti a. Kan rama thing leh mau te, tuihnate humhalh zel tura chahin, Pathian min pek kan ram hi nghet taka kan luah zel theih nan inthlah pun deuh deuh a ngai tih a sawi a, kan chhehvelah ram neilo hnam lian tak tak an awm phung a ni tih hrerengin kan ram kan hnam hi duat taka enkawl a ṭul a ni, a ti a. Hmasawnna leh changkanna chu rilru lam aṭanga inṭan nia a hriat thusawiin, rilru dik tak pua ram leh khawtlang tana mi ṭangkai nih thar tum ṭheuh turin mipuite a sawm a, Minister hian Lungkawlh MUP hnenah Pawndum leina tur pawisa a pe a, Branch YMA hnenah Jubilee senso phuhrukna tur thilpek a hlan bawk.

Minister hi Aizawl aṭangin Lalnunhlua, Jt. Director, RD-in a ṭawiawma, Serchhip aṭangin H.Dolianbuaia, Project Director, DRDA, K.Saitluanga, DIPRO leh David Zodingliana, AE, DRDA-ten ṭawiawmin Lungdar aṭangin BDO H.Lalhruaitluanga’n a ṭawiawm bawk a ni.

Jubilee hi nizan hmasa aṭangin Lungkawlh khawtlang hian an lawm ṭan a, nimin zingkarah Jubilee lungphun hawnna neiin, chhunah hian vantlang inkhawm an nei a, hetah hian Jubilee Souvenir chu Lungkawlh khawchhuak AMC Councillor ni tawh, Lungkawlh lal hnuhnung ber Lalkanglova tunu ni bawk F.Lalhuthangi’n a tlangzarh a. Hruaitu hluite chawimawina hun an nei bawk a. Tlai lamah khawtlang huapin ruai an ṭheh a, nizan khan vantlang inkhawm nei lehin Jubilee lawmna an khar a ni.

Lungkawlh khua hi N.Vanlaiphai chhak, Hrangturzo tlang chhim lama awm a ni a, tunah hian in 160 vel awmin mihring 850 vel an cheng mek a, YMA member hi 536 an awm mek a ni.