Kolasib District MJA hruaitute’n nimin khan Kolasib DC Zoengsanga chu a office-ah kâwmin kar kalta Inrinnia an district chhunga ILP lailawk pek chhuahna hmun 3 an tlawh chungchang an sawipui.
MJA member-te hian ILP pekchhuahna hmunte tihchang-tlun a nih theih nan thawktu dah belh ṭul nia an hriat thu thlenin, ILP pe chhuaktute hi nitin darkar 24 an duty ṭhin avanga an hah theih thu DC chu an hrilh a. Vairengtea ILP pek chhuahna hmun leh Police check gate chu a inhnaih em avangin lirthei ding leh ILP la tur bakah thil dang endiktir an tam changin lirthei tlan vel tan harsatna a thleng ṭhin nia an hriat thu leh Bairabi Rel chawlhhmuna ILP pek chhuahna awm ṭhin, tun hnaia tihtawp chu an ngai mawh thu MJA te hian an thlen bawk.
Kolasib DC chuan Vairengtea ILP pek chhuahna hmun leh Police check gate inhnaih lutuk chungchangah hma an lak tawh thu sawiin, hmunhma thar sak a ṭul dante sawrkarah an thlen tawh, a ti a. Bairabi Rel station-a ILP pek chhuahna awm thin chu nikum September thla aṭang khan tihtawp lailawk a nih thu sawiin, hemi chungchang pawh hi thuneitute hnenah an thlen tawh thu DC hian Kolasib MJA te hi a hrilh a ni.
Kolasib District MJA chuan Serkhan leh Bhaga inkar Saiphaiah ILP pek chhuahna hmun hawn ve a tul nia an hriat thu an sawi chu hemi chung-chang pawh hi sawrkar thunei-tute hnenah an thlen tawh thu Kolasib DC hian MJA te hi a hrilh a ni.
Kolasib DC chuan ILP pekchhuah leh endik chung-changah dik leh fel thei ang bera hma an lak thu sawiin, ILP kalphung leh a hman dan siam tha turin Mizo mipuite an pawimawh, a ti a. ILP hnuaia hnam dang la luttute chu an tih tur leh mawhphurhna te hlen chhuak theuh tura a duh thu a sawi bawk.
Kolasib District MJA member te hian kar kalta Inrinni khan Vairengte, Phaisen leh Bairabi-a ILP lailawk pek chhuahna leh endikna hmun te an tlawh a ni.