KTP Gen. Conference dawn turah sawrkar atangin sum hmuh beisei tawh loh tum

Nakum, 2020 February thlaa Serchhip-in KṬP General Conference a dawn turah sawrkar aṭanga cheng nuai 20 hmuh an tumnaah remchan lohna a awm avangin sawrkar aṭang chuan sum hmuh beisei tawh loh nise tiin, KṬP General Conference thlenna senso atana budget an siam tawh cheng nuai 70 chu cheng nuai 60-ah tihhniam a ni.

Nimin khan Serchhip Kawnpui Kohhran Hall-ah KṬP General Conference 2020 Organising Committee ṭhut-khawm neih a ni a, hetah hian KṬP General Conference thlen-na tur atana ruahmanna hrang hranga hmalak tawhnate report ngaihthlak a ni a, meeting-ah hian General Conference atana Budget an siam tawh chu an thlir nawn a, ruahmanna an siam hmasakah chuan Kohhran aṭanga thawhkhawm chu cheng nuai 50 a ni a, hemi bakah hian cheng nuai 20 hi sawrkar lam aṭanga hmuh beisei a ni a, sawrkar lam aṭanga hmu mai thei turin an inngaih chu an hmuh tumna lamah remchan lohna a awm thu report an dawn leh tak avangin meeting chuan KṬP General Conference an dawnna turah hian sawrkar lam aṭangin sum leh pai beisei neih tawhloh law law mai nise sawrkar sum beisei lova inkhawmpui thlen chu lung-rual takin an pawm ta a. Budget cheng nuai 70 an lo siam tawh pawh cheng nuai 60-ah tla thlain, cheng nuai 10 chu Conference thleng tur Pastor Bial hrang hrang-ten insem leh mai nise an ti a, Serchhip Pastor Bial-in cheng nuai 4, New Serchhip Pastor Bial-in cheng nuai 2.5 leh Serchhip Vengchung Pastor Bial-in nuai 3.5 thawh turin additional budget-ah siam a ni leh ta a ni.

Ogranising committee chuan KṬP General Conference Serchhipin a dawn turah Kohhran mipuite chu mahni phak ang tawka theihtawp chhuah ṭheuh turin a ngen a, sub-committee hrang hrangte pawh budget tihhniam a nih leh tak avang hian an sum hmanna ruahmante uluk taka siam a, renchem taka sum hmang turin a chah bawk.

Meeting chuan KṬP Gen Conference 2020 Serchhip-in a dawn tur denchhenin Serchhipa mobile service provider hrang hrangte an service tiṭha lehzual tura ngen nise an ti a, District chhunga Ui leh ar khuahkhirh turin District Magistrate ngen nise an ti a, Chhiahtlang to Lamchhip kawng la siam zawhloh chu siam zawh thuai a nih theih nan sawrkarah ngen nise an ti a, Leisekawt field-a Pavillion awmlai chu ṭhiah a nih theih nan UD&PA ah thlen nise an ti bawk.

KṬP Gen conference Serchhipin 2020-a an dawn turah hian Organising Committee chuan Sub Committee peng hrang hrang 9 a siam a, November ni 26 hian pandal sak hna ṭan a ni dawn a, December ni 16 thlengin Kohhran hnatlangin Pandal sak hna hi thawh tum a ni a, Conference thleng tur Pastor Bial 3-ten a inchhawka hnatlangin pandal sak hna hi an thawk ang.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram