Zothlifim Logo
Loading ...

Nakum February thlaa Serchhipin a dawn tur, KṬP General Conference neihna tur pandal chu nimin khan Leise-kawt Field-ah sak ṭan a ni ta.

Nimina pandal sak hna thawh bulṭanna hi zing dar 9:30-ah Leisekawt Field-ah neih niin, Serchhip bial vawngtu, Pastor H.Lal-awmpuia’n ṭawngṭaia Pathian hnena inhlanna a neih hnuah KṭP Gen. Conference thlengtu tur Pastor bial 3-ten a huhova hnatlang neiin pandal sak hna hi thawh ṭan a ni a, nimina hnatlang hi mi 170 vel an thawk chhuak a ni.

KṬP General Conference 2020 pandal tur hi Synod Pandal Structure thar niin, KL Fabrication, Mission Veng siam a ni a, pandal hi a vâng ft 165 leh a dung ft 252.7 a lian tur niin, lamtual hi 108 x 30ft-a zau tura ruahman a ni a, stage 72 x 30ft leh Green Room 72 x 15ft ni tura ruahman a ni bawk a, pandal-ah hian mi 10,000 vel leng tura ngaih a ni a. He pandal structure thar hi siam zawh hlim a ni a, Serchhip a KṬP General conference a hman hi a hman hmasakna ber tur a ni.

Vawiin aṭangin Serchhipa pastor bial pathuma Kohhran hrang hrangten a inchhawka hnatlang neiin pandal sak hna hi an chhunzawm chho dawn a, pandal structure remkhawm hna hi chawlhkar 2 chhung vela zawh hman tum a ni.