Nimin khan Aijal Club-ah Law and Judicial Department-in a buatsaih Sawrkar Ukil tana Refresher Course Training ni hnih (2) chhung awh tur chu TJ Lalnuntluanga, Minister of State, Law & Judicial Department chuan a hawng.
Khuallian chuan Mizorama Judiciary hmasawnna tur thil tam tak Chief Justice, Gauhati High Court nen an sawi dun tawh thu a sawi a. Sawrkar ukil ten an hnathawhna kawngah thiamna an neih belh theih nan intuaihriamna neih a pawimawh tih an sawi dun atangin he training hi Sawrkarin a buatsaih ta a ni a ti. Sawrkar thar hian bul la tan tir chauh ni mah se, dan rorelna dik a chhuah theihna atana Court rorelna puihna kawngah Mizoramin hmasawnna tam tak a nei tawh a. Rah duhawm tak a la chhuah zel dawn a ni tih a sawi a. Mizoram Ukilte a chhuan thu sawiin kaihhruaina tha hnuaia an intuaihriam thin chuan India ram pum huap pawha ukil tha ber ber an ni thei ngei ang a ti. Sawrkar ukilte chu Sawrkar tana ding an nih angin Sawrkar Department tinten an mamawhna apianga an dawr theih reng tura Pisa kai hun chhung ngaipawimawh turin a chah bawk a ni.
He training hawnna-ah hian Law & Judicial Department Secretary Pi Marli Vankung chuan inlawmna thu sawiin Advocates lo kalte hmelhriattirna a nei hmasa a. Resource Person, Assam Judicial Academy atanga lo kal SP Moitra, Senior Faculty leh Roshan Lal, Faculty Member ten zirtirna an pe a . He training-ah hian District 8 (pariat) atanga Sawrkar Ukilte an kal a ni.