Lunglei Pukpui ram chungchang sawiho

Indian Air Force-in Pukpui hmun hlui an luah chungchang-ah nimin khan IAF Squadron Leader, Lunglei Settlement Officer, Pukpui VCP leh NGO hruaitute Pukpuiah an inkawm.

Lunglei Settlement Officer Misael-a chuan IAF Squadron Leader Lalrinsanga chu Shil-long aṭangin sawrkar laipuiin a tir tih sawiin, nimina an inkawm-honaa thu leh hlate chu ani hian hotu sâng zawkte hnenah a thlen leh dawn a ni, a ti.

Pukpui khawtlang hian Pukpui hmun hlui chu IAF-in an luah an phal loh chhan zing-ah tuna Pukpui Centenary lung-phun chu IAF-ten ‘a sâng lutuk, khawthlirna a dal, venhimna lamah IAF a tibuai a, ṭhiah a ngai’ an tih leh IAF-ten Pukpui hmun hlui an luah chuan an luah chin bak meter 300 chu kut thlak phal loh a ni ang tih bak-ah sawrkar laipuiin ‘Restricted area’ a siam chungchang sawi-fiah tur leh rambuai laia Biak In hmun vawiin thlenga sipaite’n an luah chu civil mite pe lêt leh tura an phutna te a tel a ni.

Pukpui khawtlang hian an lungawilohna hi Prime Minister leh President hnenah thlen an tum tih an sawi a, an thlen tak leh tak loh erawh a la hriat loh thu Settlement Officer hian a sawi bawk.

Leave a Reply

This site uses Akismet to reduce spam. Learn how your comment data is processed.