Categories
Chanchinthar Mizoram

MADS Annual Art Exhibition I&PR Director-in a hawng

Nimin khan ni 6 chhung awh tur I&PR department leh Mizoram Art Development Society buatsaih Annual Art Exhibition chu I&PR Director Lallianpuii’n MC Cabe Hall, Aijal Club-ah a hawng.

Hawnna thu sawiin Lallianpuii chuan Mizo-ten kawng hrang hrangah hma kan sawn nasa em em a, mitin hian engtikawng zawng emaw berin ṭangkaina kan nei ṭheuh a, kan mizia leh kan rilru sukthlek azirin kawng hrang hrangin tuina bik kan nei ṭhin a, chung zingah chuan Pathian thilsiam ropui tak takte mawi taka phochhuak ṭhintute chu artist-te hi an ni a ti a. Artist-te hlutna sawiin, mipui vantlangin an ngaihtuah leh suangtuah phak loh thil an ngaihtuahin mawi tak takin an pho chhuak ṭhin a ni a ti. Mizoram Art Development Society-in lemziak lama tuite leh talent nei ṭha te zawng chhuak tura hma an la ṭhin chu fakawm a tih thu a sawi a, school-level painting competition buatsaih tura an inpuah-chahnaah duhsakna a hlan nghal a, art ṭangkaizia chu mipuite leh sawrkar pawhin an hre telh telh a, human resource development atana hmalakna peng pawimawh tak a ni bawk a ni a ti. New Delhi a Mizo lemziak thiamte kutchhuak phochhuah-na art exhibition neihin rah ṭha a chhuah thu tarlangin kum thar tir lamah Kolkata-a art exhibition nei turin ruahmanna kalpui mek a ni a ti bawk.

Mizoram Art Development Society hnuaiah hian member 80 chuang hret an awm a, annual art exhibition hi kum 2013 aṭang khan I&PR department nen ṭangrualin kumtin November thla apiang-in an buatsaih ṭhin a ni. Tun ṭum annual art exhibition hi November ni 7-13, 2019 chhunga neih tur niin, art exhibition neihna hmun MC Cabe hall, Aijal Club-ah hian lemziak thiam 38 leh milem tuk thiam 1 kutchhuak hrang hrang 78 tarchhuah a ni a, a duh apiang tan zing dar 10 aṭanga tlai dar 5 thleng a tlawh theih a, an kutchhuak phochhuah te hi a lei theih bawk a ni.

Annual art exhibition ah hian artist-te kutchhuak thar chi hrang hrang khawi hmunah mah la tarchhuah loh chiah phochhuah thin a ni.

By Editor

C.Lalrochhuanga,
New Serchhip, Serchhip - 796181
Mizoram
Contact: WhatsApp | Phone Call | Telegram

Leave a Reply

This site uses Akismet to reduce spam. Learn how your comment data is processed.