Lionel Messi chuan July thla hnua a vawi khatna atan Argentina tan goal a thun ve leh ta a, Saudi Arabia-a Brazil nen friendly match an khelhnaah Messi hian goal thunin Argentina hi 1-0-in a chakpui a ni.
He inkhelah hian Messi penalty pet chu Brazil keeper Alisson chuan a lo dansak a, mahse minute 69-naah goal hi a thun leh ta tho a. Hemi hma hian Gabriel Jesus chuan Brazil tan penalty a pet goal lo bawk a ni.
Messi hi Copa America chu ‘Brazil champion tura ruahman lawk’ nia a sawi avangin thla 3 hrem a nih hnuah a inkhel ve leh thei ta a, Argentina hian semi-final-ah Brazil hi an hneh lova, Brazil hi Peru hnehin an champion ta bawk a ni.
Hetihlai hian Copa America-a an champion hnuah Brazil hian match 5 chak an nei lo zawn ta a, Argentina an hmachhawn ṭum hian huntawp dawnah Aston Villa striker Wesley chu Brazil tana a vawi khat inlanna turin luhtir a ni.
Argentina hian vawiinah Tel Aviv-ah Uruguay hmachhawn tur an nia, mahse Israel-a buaina thleng vangin an inkhel tur hi cancel a ni mai thei a, Brazil hian naktukah Abu Dhabi-ah South Korea an hmachhawn dawn a ni.