Zothlifim Logo
Loading ...

Mizorama Science lama intawhkhawmna lian ber Mizoram Science Congress chu nakum 2020 khian neih leh tum a ni a. He Congress Organizing Committee-te hian ṭhutkhawmna hmasa ber chu Directorate of Science & Technology Conference Hall, Mizoram New Capital Complex-ah an nei.

He meeting hi Dr. RK Lallianthanga, Chief Scientific Officer, Science & Technology leh Chairman, Mizoram Science Congress 2020 Organising Committee chuan a kaihruai a. Mizorama hetiang ang Science lama intawhkhawmna pui hi a tum thumna tur a nih thu sawiin, hlawhtling takin kum 2016 leh 2018 te khan Mizoram University-ah leh Pachhunga University College-ah te buatsaih a lo ni tawh a ni a ti. Hetiang ang hun hi Zirlai tam takten an hlawkpui hle a, research ti mêkte pawhin an hnathawh te pholanna hun remchang an neih phah a, zirna in hrang hrang leh Mizopa kut themthiam (grassroot innovator) te thlengin an thiamthil leh hmuhchhuah te an pholang ṭhin a ni a ti. Hei bakah hian State Children Science Congress neih tel nghal thin a ni bawk a, zirlai naupang zawk tam takten an hlawkpui hle thin a ni a ti bawk. He Congress hian science lama hmasawnna bakah heti lama thawktute leh tlawmngai pawl hrang hrangte inkarah inunauna leh thawhhona ṭha zawk a thlen ṭhin thu a sawi bawk.

Mizoram Science Congress 2020 Organising Committee-ah hian Dr. Lalhriatzuala, Mizoram Science Society-a Secretary ni mek leh Pachhunga University College-a Asst. Professor ni bawk chu Secretary a ni a, ani bakah hian Office Bearer dang mi 3 leh Committee Member 21 an awm a ni.

Mizoram Science Congress 2020 hi Pachhunga University College, Aizawlah neih tum a ni a, a hun atan October 15-16, 2020 hi tin zâwn a ni. Tin, theme atan ‘Science as a soul of prosperity and sustenance’ tih chu thlan a ni bawk. Meeting-ah hian kawng hrang hranga hma latu tur sub-committee hrang hrang siam a nih bakah chûnga a mawhphurtu tûrte inruat fel a ni. Science Congress-ah hian Mizoram mai bakah India rama science lama thiamna nei bik mi thahnem tak te lo tel tura beisei an ni.

Mizoram Science Congress 2020 bultumtu te hi Mizoram Science, Technology & Innovation Council (MISTIC), Directorate of Science & Technology leh Mizorama Science lam tlawmngai pawl hrang hrang – Mizoram Science Society (MSS), Science Teachers’ Association Mizoram (STAM), Mizo Academy of Sciences (MAS), Mizoram Mathematics Society (MMS), Geological Society of Mizoram (GSM) leh Biodiversity & Nature Conservation Network (BIOCONE) te an ni.