Mizoram Journalists’ Association (MJA) General Headquarters hruaituten District hrang hrang tlawh chhuah tuma an hmalakna kal zelah November ni 21 & 22, 2019 khan Serchhip District an rawn tlawh a, Serchhip District MJA member-te nen inkawmhona an neih bakah Gen. Hqrs. hruaitute leh MJA member-ten Serchhipa Horticulture Department leh Fisheries Department hmalaknate an tlawh.
Ningani chhuna Horticulture Department hmalakna an tlawh hnuah tlai dar 5 khan Horticulture Guest House, Serchhip-ah MJA Gen. Hqrs. hruaitute leh MJA, Serchhip District member-te hian inkawmhona hun an hmang a, he hunah hian Zonunsanga Khiangte, President, MJA Gen. Hqrs. chuan thusawiin, MJA member-te chu mahni tawka hlauh nei lo an ni chungin pawl chhungah discipline ṭha tak a awm a, memberten pawl hruaitute thu an ngai pawimawh thiam ṭhinte chu lawmawm a tih thu a sawi a, MJA hmalakna hrang hrang a sawi zingah India ram state dang mai ni lo, hmarchhak state dang sawrkarte pawhin Journalist pension scheme an kalpui tawh angin, Mizorama Journalist-ten pension an neih ve theih dan tur pawh bawhzui mek zel a ni tih a sawi a, he hunah hian MJA, Serchhip District hruaitute pawhin an ngaimawh leh MJA kalphung tura an duhdante an sawi bawk a ni.
Zirtawpni zing khan District Bawrhsap Sangchhin Chinzah, MCS chuan MJA memberte tan hian a bangla-ah chawhlui a buatsaihsak a, he hunah hian MJA hruaitute chuan kumin Serchhipin Mizo-rama khawfai ber lawmman a dawnah an lawmpui thu hrilh-in, Serchhipa buaina lian leh harsatna lian a thleng ngai lote chu ṭha an tih thu an hrilh a ni.
Hemi ni vek hian chhun lamah Serchhip District Fisheries Department-in Serhhip leh a chhehvela an hmalakna hrang hrangte MJA member-te hian an fangkual leh a, MJA member-te hi Zonuntluangi, DFDO, Serchhip District leh Hmangaihthanga, President, Serchhip District Fish Farmers’ Association-ten lo dawng-sawngin, mimal sangha dil hrang hrangte an fankualpui bakah an hmalakna leh an hmachhawpte an hrilh a, Fisheries Department, Serchhip District hnuaiah sangha dil nei chhungkaw 1321 an awm a ni.
Sangha dil an tlawhnaah hian nikuma Northeast Best Fish Farmer Award dawngtu Hmangaihthanga, Serchhip Zozam vengin ama ngaihtuah chhuahna hmanga a siam, dil sah dawna tui paih chhuah dan technology, MT Technology kalphung a hrilhfiah bawk a ni.
Zonunsanga Khiangte, President, MJA chuan sangha dil neitute thawhrimzia a taka an hmuh chu chhuanawm a tih thu a sawi a, sangha khawitute hlawhtlinna chu sangha khawitute leh department lamin thawhhona ṭha tak an neih vanga thleng nia a hriat thu a sawi bawk.