Categories
Chanchinthar Politics Serchhip

MLA Fund hmanga lei siam thar hawng

Serchhip Dinthar Venga Sesah lui kawr kânna lei, MLA Fund hmanga siam thar chu nimin chhun dar 12 khan Bialtu MLA Lalduhoma’n a hawng.

Sesah lei dawh ṭhat a hawnnaah hian Lalduhoma chuan thu sawiin, hetianga hna ṭha tak leh belhchian dawl tak, MLA Fund hmanga a bial chhunga thawh a ni chu lawmawm a tih thu a sawi a, ZPM chuan hna ṭha taka an thawh zel tur thu sawiin, Sesah lei dawh hna chu a bul ṭanna a nih thu leh a tawp thlengin Sesahlui lei anga ṭha leh belhchian dawla hna an thawh tur thu a sawi a, MLA Fund hmanga hnathawh chuan huang chin a neih thu sawiin, chumi huang chin pela MLA Fund hman chu ZPM chuan an tih ve dawn loh thu a sawi a, Serchhip khawtlang hma-sawnna turin dik tak leh ṭha takin MLA Fund chu an hmang ṭhin dawn tih a sawi bawk.

Lalduhoma chuan MLA hamṭhatna dawn leh an hlawh pun chungchang sawiin, “Hlawh pun hi tunlai khawsak hautakzia thlirin leh, MLA-te dinhmun thlir chuan âwm lo em em pawh a ni lo; mahse, kan state retheihzia leh pachhiatzia ngaihtuah chuan, thil inmil lo tak leh tih loh tawp tur a ni,” tiin, Minister bakah, ruling MLA-te, ‘MLA fáng’ kan tih mai ang ni lova, Minister ang maia hautaka khawsa tura nihna an inbel thluahte chu ṭha lo a tih thu a sawi bawk.

Lalduhoma chuan, MLA hlawh ennawntu tur Committee-ah vawi khat chiah a tel thu leh, thuthlukna pawh siam lovin, a ngaihtuahtu tur pawh ruat ṭhaa uluk lehzuala sawiho chi a nih zawk thu chauh an rél lai a, a hriat zui ve tawh miah lova hlawh tihpun ni tura thu a chhuak ta mai chu mak a tih zawk thu a sawi a, sawrkar ro rel dan chu felhlel leh buar-chuar a tih thu a sawi bawk.

Lei siam thar hawnna inkhawm tawiah hian veng-chhung NGO hrang hrang – YMA, MUP, MHIP hruaitute leh VC- II member-te an tel a ni.

By Editor

C.Lalrochhuanga,
New Serchhip, Serchhip - 796181
Mizoram
Contact: WhatsApp | Phone Call | Telegram