MYC-in thalai lehkhathiam hna neilote hna zawn nan kuminah Job Portal an siam dawn

Mizoram Youth Commission (MYC) chuan ṭhalai lehkhathiam hna neilo te hna zawn nan kumin kum tawp hma in Job Portal an siam dawn.

MYC Chairman, Dr Vanlaltanpuia chuan he thu hi nimin khan Aizawl-a an office ah thuthar thehdarhtute kawmin a hrilh a, he Job Portal ah hian hna zawng lai mek te chu an in ziaklut anga, chumi hmang chuan an hna duh ang leh thawh chak zawng te a zawn theih dawn a ni a ti.

Job Portal kalpui tur hian MYC chuan a budget atangin cheng vaibelchhe 5 a dah a, hei bakah hian cheng vaibelchhe 9 a dah bawk a, hei hi an hmalakna tihchangtlunna atana hman tur a ni ang.

Dr. Vanlalṭanpuia chuan ṭhalai te zingah hna hmulo an tam lutuk chuan a timangang hle tih a sawi a, he harsatna sukiang tura MYC hmalakna chu hmang tangkai turin thalai zawng zawng a sawm tih a sawi a, sumdawnna kawng zawh duh a, mahni intunnun tum an awm anih phawt chuan MYC chuan dawmkan a duh a, an inhawng reng tih a sawi a ni.

MYC hian All India Service leh Central Service dang atana inbuatsaih duh te tanpui nan cheng nuai 45 a pe chhuak tawh tih he hunah hian tarlan a ni bawk a ni.

MYC hian Indian Army Rally 2019 a intlar tum thalai te inbuatsaihna tur a siamsak a, Assam Rifles leh Counter Insurgency and Jungle Warfare School-a an hotute pawhin an pui a, kumin sipai intlarnaah mi 97-in physical test an paltlang a, 50 vel chu written exam pe tura tih an ni a, MYC hian nakum January thlaa sipai lak runpui neih tur atan pawh training a buatsaih dawn bawk a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram