Mizo Zirlai Pawl (MZP) bultumin Parliament thlasik ṭhutkhawmin, Citizenship Amendment Bill tharthawh leh a tum duhlohna lantirna hun hman a ni.
Nimin khan India hmarchhak state hrang hrangah North East Students’ Organisation (NESO) hmalakna-in CAB dodalna a ruala neih a ni a, Mizoramah pawh MZP bultumin Vanapa hall kawtah Sit-in Protest hi neih a ni a, he
hun hi Peter Chhangte, Vice President chuan a kaihruai a, Lalnunmawia Pautu, General Secretary chuan MZP leh NESO-ten Citizenship Amendment Bill a tir aṭanga an dodal dan hrang hrang report a pe a, B.Vanlalṭana, President leh Ricky Lalbiakmawia, NESO Finance Secretary-ten thu an sawi a, Sit-in Protest hman zawh a nih hnu hian Mizoram Larsap hnenah Memorandum thehluh nghal a ni.
MZP President chuan, Citizenship Amendmend Bill chu North East mite mai nilo, Zofate tan a him lo tih a sawi a, he bill pass tum a nih dodal nana Republic Day Boycott tum a nih laia Mizoram sawrkarin a intiam tawh ang ngeia a tih tur ti ve turin sawrkar chu a ngen thu leh a phut nghal thu a sawi a, Central BJP sawrkarin he bill hi a pass lui a nih chuan Mizo ṭhalaiten an tihtur an ti ve dawn tih a sawi bawk.
NESO Finance Secretary chuan Citizenship Amendment Bill chu Hindu sakhua duhsak bikna bill a ni tiin, Kristiante nêkchêp tumna hmanrua a nih avangin he bill hi a hlauhawm hle tih a sawi a, hmarchhak state-te chu duh loh paih khawmna hmun atan emaw sakhua duhsak bik dahkhawm nana hman an phal lo tih a sawiin, he bill hi NESO chuan a tawp thlengin a dodal zel dawn a ni a ti a. Tunhmaa Mizoram Chief Minister-in a lo dodal ṭhinna chu fakin tunah hian hma a la chhunzawm dawn em tih chu North East mipuiten an thlir mek tih a sawi a, mahni party leh mimal hamṭhatna dah ṭhaa Ram leh Hnam himna tura he Bill dopui tur hian an ngen nghal bawk.
MZP hian sit-in protest an neih hma hian an pisa puiah an president B.Vanlaltana kaihhruaiin executive meeting an nei a, meeting-ah hian kum danga neih ṭhin MZP InterHigh School Quiz 2019 chu kuminah neih leh ni se tiin, Mizoram chhunga High School zawng zawng tel turin an sawm nghal a, MZP Rorelna sang Assembly in a lo pass tawh “Mizoram leh Assam ramri chinfel a nih theih nan MZPin hma a lak mek hi chak lehzuala hmalak chhunzawm ni rawh se,” tih chu ruahmanna siamin Mizoram sawrkarah na zawka nawr nise an ti bawk a, meeting hian MZP Gen. Hqrs.a appointed secretary 10 an ruat nghal bawk a ni.