Mizoram Journalists’ Association (MJA) member-te tana Mizoram sawrkarin Press Study Tour a buatsaih chhawng 4 awm tura a hmasa ber team chuan Inrinni khan Aizawl an chhuahsan a, he press study tour-ah hian Serchhip District aṭangin MJA president C.Ramengmawia chu a kal a ni.
MJA member 9 leh I&PR department mi 3 telna he Press Tour batch hmasa ber hi I&PR minister Lalruatkima chuan Directorate of I&PR office kawt aṭangin a vailiam a. Hemi hmaa inkhawm tawi buatsaihah minister chuan MJA tana Study Tour neih chu ṭul an tih avangin finance changtu chief minister hnenah ngenngawl takin an thlen a, ani’n rang taka a tihhlawhtlinsak avangin an lawm hle tih a sawi.
Thuthar thehdarhna lam enkawltute chu mipui zirtirtu tur, an thu leh hlaa sawrkar hma-lakna hrang hrang puangzar a, mipuite kawng dik kawhhmuha zirtir chu an mawhphurh a ni tiin, tunlai khawvel technology thang zelah chanchinbumite pawh intuaithar leh hriatna tihpun zel a ngai tih Lalruatkima chuan a sawi a.
India ram state dangin hmasawnna an neih dante hmuh a, chumi hmang chuan mipui an zirtir theihna’n he tour hi ruahman a ni a. Mi state hmasawnna Mizoram tana chhawr ve theih tur te, tourism industry lama hlawkpui theih dan tur te leh, hnamdangte nena inzarzawmna zelnaah pawh pur zuk chawk tur an hmu ngei a ring tih a sawi.
He hunah hian I&PR director Lallianpuii leh MJA Treasurer C.Lalhmachhuana-ten thu an sawi a, sawrkarin journalist-te tana tour tam zawk, ṭumdanga an la tawn ngai loh tunhnai maia a buatsaihsak chu lawmawm an tih thu an sawi a ni.
Tun ṭuma Press Study Tour-a chhhuak te hian Chennai leh Puducherry an tlawh dawn a, Mizoram sawrkar hnuaia rawn thawk tawh IAS leh IPS ṭhenkhat awmna a nih angin anni pawh hi I&PR official-ten an be pawp tawh a, an kalna tur state sawrkarin ruahmanna a lo siamsak dawn a, ruahman lawk ang chuan November 15 hian Mizoram an rawn let leh tura ruahman an ni a, hetihlai hian tun ṭum tour-a kalte hian Inrinni tlai khan Kolkata an thleng a, mahse Cyclone Bulbul avanga Airport khâr a nih avangin Chennai-a an tlang thei lova, nimin nileng khan Kolkata-ah châmin, nizan pawh khan Kolkata-ah an la riak a ni.