Nimin khan Rubber and Allied Crops Development Board chu an chairman, R.Lal-zirliana, Land Resources, Soil & Water Conservation Minister ni bawk hovin Minister Office-ah an ṭhukhawm a, Board hmalakna tur an sawiho a ni.
Meeting kaihruaitu Minister R.Lalzirliana chuan Department-ten Board Member Secretary Valbuanga hova rang taka hma lakna tur proposal ṭha tak an siam chu lawmawm a tih thu sawiin, Development Board zinga hma lâkna tur ruahmanna pharh thei hmasa pawl an nih thu a sawi a, Board Vice Chairman Lalrinsanga Ralte chuan tharchhuah reng rengah, a hralhna market hi a pawimawh ber a, chuvangin a hralhchhuahna lamah market linkage siam a pawimawh dawn a, chutiang hawi zawnga a tir aṭanga ruahmanna tel nghal ṭha a tih thu a sawi a ni.
Secretary, LR, S&WC Val-buanga, Rubber & Allied Crops Development Board, Member Secretary ni bawk chuan SEDP hnuaia Board hma lak tum dan leh hmachhawpte sawiin hma lakna tur ruahmanna an lo duan chhin te pharhin chungte chu a sawifiah a. Rubber bika hma lakna tur chu kum 10 atan duan chin niin a kum khatna ah Kolasib, Mamit leh Lunglei District, rubber thatna hmunah te kalpui tum Department a ruahman chu Board chuan ṭha an ti a. Member ṭhenkhatte chuan cluster leh chhungkaw behchanna ruahmanna te hi kalpui ṭha an tih thu a sawi lang a ni. Link Road pawimawhna chu meeting a sawilan niin hei hi Department dangte nena sawiho a, a ruala convergence a kalpui dan zawn ṭha an tih thu Member-te hian an sawi bawk a ni.
Board-in SEDP kaltlanga hmalak a tum ruahmanna te chu – rubber behchan a loneitu-te leh thingtlang lamah awmte tan eizawnna siamsak thei tur project cheng vbc. 1659.34-te, Mizorama coffee chinna hmun hma te tizauhna tur leh coffee kung natna in a tichhiat te thlak a, a thar chinna tur project cheng vbc. 85.87-te, hmunphiah chin belhna tur project cheng vbc. 107.47 te; kuhva chinna hmun tihzauh leh a sawngbawl-na tur project cheng vbc. 81.64-te leh ruahtui avanga ram chhe thei tur venna ni paha loneitute ṭangkaipui thei tur project cheng vbc. 109.05-te an ni.