Nimin khan Mizoram Middle School Teachers Association (MSTA) General Headquarters hnuaia Academic Sub-Committee hmalaknaa zirna chungchanga zirchhiana an neih Education Survey 2019 Report chu SCERT Auditorium Chaltlang-ah Laldawngliani Chawngthu, Director, SCERT chuan a tlangzarh.
Survey hi thla 10 chhunga buaipuiin mi 1135 an kâwm a. He Report atana mi Inhlawhfa mite, eizawnna tenau dang leh Sumdawng lian buaipuite, Firm leh Company hnuaia thawk mekte, lehkha thiam hna nghet thawk lai leh sawrkara hna sang thawkte, center leh Jaila awm mekte, ruihhloin a tihbuai mek te bakah hna mumal thawh nei lova khawlai leng vel ṭhin te hmaichhanah kawmna an nei a. He Report aṭanga a landan chuan hna thawk peih leh sum thawk chhuak peihte zingah sawrkar school-a primary leh middle school kal chhuak an ṭhahnem hle a, hnasang thawk leh lehkhathiam hna nghet neite bakah sapṭawng hman ṭulna firm leh company hnuaia thawkteah pawh sawrkar school chhuak an tam zawk hle a ni.
Thalai intichangkang leng vakvel zingah erawh chuan sawrkar school chhuak an awm meuh lo a. Hnasang thawk leh lehkha thiam takte zingah ruihtheih thila buai an awm mang lova. Mi tam tak te zuk leh hmuam leh ruihtheih thila fihlim lo an awm laiin hetiang thila fihlim leh insum thei an pung tawh hle a ni.