Zothlifim Logo
Loading ...

Chief Minister Zoramthanga chuan Socio-Economic Development Policy (SEDP) chu pawisa bituk zât neia sem den den lam a niloh thu a sawi a, Board kaltlangin sawrkar laipui sum tam tak awm hmang ṭangkai tura ruahmanna, hmasawnna tur hnathawh theih hrang hrangte project ah siamin hmalak zel tur a nih thu a sawi.

He thu hi nimina SEDP hnuaia Board hrang hrang 14-te office, Secretariat Building Annex-II, Treasury Square-a buatsaih a hawnnaah Chief Minister chuan he thu hi sawiin, SEDP inkaihhruaina milin sawrkarin hma la-in policy a siam a, chu policy ṭheuh kalpuina tura Minister Chairman-na hnuaiah Vice-Chairman leh board member te awmin an vaiin an thawkho dawn a ni, a ti a. Board member-te chuan a taka hnathawh leh enzui, monitoring pawh an thawh zui tur thu a sawi a. Board hrang hrangte a awlsam thei ang bera dinin, hlawh pêk leh thawktu rawih chung-changahte pawh a inrenchem zawng zela ruahmanna siam a nih thu a sawi a. Chutihrual chuan Board te chuan thawh tur an neih tam hle thu sawiin, member leh mawhphurtuten an zawn ṭheuhva hnathawh te theihtawp chhuah a an thawh a beisei thu a sawi bawk a. Tlin taka hna an thawh theih nan mamawh belhna a awm a nih chuan board dang din te, member thar lak te pawh a tul ang zela kalpui a la nih tur thu a sawi bawk.

Chief Minister chuan Mizoram chu hmasawnna kawng hrang hrang – ei leh barah te, mipui nunphungah leh hmasawnna policy kalphungah te India hmarchhaka hmahruaitua dah chu sawrkarin a tum thu a sawi a. Chumi atan chuan SEDP chu siamin, policy tipuitling tura hma la turin Board 14-te chu din an nih thu a sawi a. SEDP chuan a huam zau thu leh khawilai bik emaw tan chauh nilova mitin tan a nih thu a sawi a. Chief Minister chuan he sawrkar hmalaknapui ber hi economic sector zawng zawngah leh social sector zawng zawngah hmasawnna pui thlen theihna tura buatsaih a nih thu sawiin, social sector-ah chuan Healthcare-in bul ṭan a nih thu a sawi a. Healthcare Scheme hnuaiah chhung tin tan cheng nuai 2 hnuai lamah chuan damlo inenkawlna tum sak an nih tawh thu a sawi. Chief Minister chuan sector dang dangah leh administrative sector-ahte pawh ruahmanna siam niin hmalak chhoh zel a nih tur thu a sawi.

Health & Family Welfare Board Vice-Chairman Dr. Z.R. Thiamsanga chuan board zawng zawng aiawhin thu a sawi a. Ram leh hnam hmasawn theihna tura SEDP hnuaia board pawimawh tak tak dinchhuah a nih thu sawiin, Board hmalak zelna tura officialte leh mipui ṭawiawmna a pawimawh tur thu sawiin, SEDP hmalakna zingah Health Care-ah phei chuan thui tak hmalak a lo nih tawh thute, ṭangkai taka hman chhoh zel a nih tur thu a sawi.

Heng office thar hawnna inkhawm, Assembly House Annex Conference Hall a buatsaihah hian Dy. Chief Minister Tawnluia, Health & Family Welfare Minister Dr. R. Lalthangliana, Dy. Speaker Er. Lalrinawma, Law & Judicial Minister TJ Lalnuntluanga, Sports Minister Robert Romawia Royte leh Board Vice Chairman te an tel a ni.

Office thar hawnna inkhawm hi Zorammuana, GAD Joint Secretary chuan kaihruaiin, Planning & Programme Implementation Department Commissioner Esther Lalruatkimi chuan lawmthu sawiin hun a khar a. He inkhawmah hian AMC Councillor-te, MZU VC, board member-te, sawrkar hnathawk te leh sawmbik dangte an tel a ni.