Sinlung Hills Council (SHC) inthlan vawi khatna nimin khan tluang takin vote thlâk a ni a, hriat theih chinah vote zaa 65 a tla a, tlai dar 4 thlenga vote thlâk zo hman lo an la awm avangin vote tla zat hi a pun rin a ni.
SHC inthlanna atan hian nimin zing dar 7 aṭang khan vote thlak ṭan a ni a. SHC-ah hian vote thlak thei mi 20914 an awm a, chung zinga 10509 chu mipa an ni a, hmeichhe voter 10405 an awm a ni. Vote tamna ber khua hi Ratu niin vote 2,546 a awm a, a tlemna ber New Vervek khua-ah Vote 1,077 a awm thung a ni.
Vote thlak zawh a nih veleh hian zanriak lovin khaw hrang hrang a vote chhiarna hmun tur ruatah Vote hi chhiar nghal tura ruahmanna siam a ni a. Counting hall hi avaiin 12 a awm dawn a, SHC-ah hian bial 12 awmin, candidate 42 an awm a, Aizawl District huamchhung-ah Polling Station 32 a awm a, Kolasib District huam chhung-ah Polling Station 7 a awm a ni.
Sinlung Hills Council hruaitu turte hi mi 12 thlan chhuah an ni ang a, sawrkar aiawh mi 2 ruat an ni bawk dawn a, an vaiin member 14 an awm dawn a ni.