Skip to content
Home » Chanchinthar » Sik leh sa inthlak danglam chungchang zirhona hun buatsaih

Sik leh sa inthlak danglam chungchang zirhona hun buatsaih

Nimin khan Agriculture Department buatsaihin sik leh sa inthlak danglam (Climate Change) chungchang zirhona hun buatsaih a ni.

He zirhona hunah hian Agriculture Department, Land Resources, Soil & Water Conservation Department leh Fisheries Department-a Officer te bakah Central YMA leh AMFU aiawh te an tel a, Meghalaya leh Nagaland aṭanga lo kal mithiamten he hun hi an chhim bawk a ni.

Sik leh sa inthlakin nghawng a neih hrang hrang leh chumi tiziaawm tura hmalak dan tur zirhona chu Rohming-thanga Colney, Director, Agriculture (Crop Husbandry) Department-in a kaihruai a, Rohmingthanga Colney chuan Climate Change kaihhnawiha Agriculture Department hmalak meknate a sawi a, sik leh sa inthlak danglamin loneitute tan harsatna a siam theih dan te a sawi bawk.

IPE Global, New Delhi aṭanga mithiam lo kal Dr. S.Satapathy, Consultant chuan kalkhawmte hmaah thu sawiin, khawvel sik leh sa inthlak danglam mek chu ngaihthah mai chi a ni lova, hei hian kawng hrang hrangin mihringte tan harsatna a thlen theih avangin an buaipui takzet a ngai tawh a ni a ti a. Khawvel lumna (temperature) hi a sâng zel a, ruah sur dan a mumal lo tulh tulh bawk a. Chutihlaiin mihring leh thlaiah natna leh eichhetu rannung an pung tulh tulh bawk a. Ramngaw a tlem tulh tulh avangin boruak thianghlim, mihring leh ramsa ten kan mamawh chu a tlem ve zel bawk si te hi ngaihthah mai chi a ni lova, mihring kan pun zel avangin ei leh bara kan mamawh zat pawh a pung ve zel a, ram bial khata buh leh bal kan thar zat erawh a pung ve hlei thei tawh si lova. Ram kan siam belh thei lova, kan ram neih ang ang hi a hman tangkai dan kan ruahman zel a tul a. Sawrkar laipuiin NAFCC (National Adaptation Fund for Climate Change) Scheme hnuaia a kalpui mek, ‘Sustainable Agriculture Development Mission’ chu chak tak leh phur taka Agriculture Department pawhin a kalpui a ngai a ni, a ti.

He hunah hian sik leh sa in kan ram a nghawng dan leh sik leh sa avanga harsatna kan tawh hrang hrangte zirho a ni a, heng harsatna te dolet a, kan phak ang tawk zela boruak chhe zel tur laka kan in ven theih dan turte sawiho a ni.

Leave a Reply

This site uses Akismet to reduce spam. Learn how your comment data is processed.