International Break a zo chiaha league match khelh leh hmain Tottenham chuan an manager Mauricio Pochettino chu an bân a, a thlak turin Jose Mourinho an lalut nghal.
Spurs hian tun season-ah bul an ṭan ṭhalo hle a, tun dinhmunah Premier League-ah 14-na an ni mek a, dinhmun ṭha zawka an din beiseiin kum 5 an lo chhawr tawh Pochettino chu an bân ta a, Pochettino thlaktu tur hian Chelsea leh Manchester United manager hlui Jose Mourinho chu Spurs hian an befel nghal a ni.
Pochettino hian Southampton chu Premier League-a an tawnsan ber a tawnpui hnuah Spurs chuan May 2014 khan an lalût a, season tluana a enkawl hmasakna berah Tottenham hi League Cup final a thlenpui nghal a, Spurs a enkawl chhung hian Premer League-ah ṭum 2 pathumna dinhmun nihpuiin, 2017 khan runner-up a nihpui a. Champions League-ah pawh Spurs hi season 4 lai a khelhpui thei a, 2017-18 season khan last 16 a thlenpui avangin May 2018-ah kum 5 daih tur contract an ziakpui a, season liamta khan Champions League final a thlenpui zui bawk.
Hetiang hian Spurs hi thlen sânpui viau ṭhin mahse trophy a chawipui thei lova, tun season-ah phei chuan an che ṭha lo hle a, Premier League-ah vawi 3 chiah hnehna a la chanpui a, November ni 9-a Sheffield United nena 1-1-a an in-draw chu Spurs tana a game hnuhnung ber a ni ta a ni.
Pochettino kalsan tak hmunruak luan tur hian Spurs chuan Mourinho an dawr nghal a, December 2018-a Manchester United a chhuahsan hnua hnathawh la nei leh lo, Mourinho hian 2022-2023 season tawp thleng daih tur contract a ziak a ni.
Portuguese coach hian China, Spain leh Portugal-a sawmnate a lo hnâwl tawh a ni.