Tourism Minister leh MLA 3-ten khawchhak tlangdung fang

Tourism Minister Robert Romawia Royte leh MLA 3 – Ramthanmawia, Prof. F.Lalnumawia leh C.Lalsawi-vunga-te chuan ni 3 chhung thangin khawchhak tlangdung Tuipuiral leh Tuichangral khaw hrang hrang te an tlawh.

November ni 5 khan Farkawn leh Sawmkheng |iau Kai tlawhin khawtlang hruaitu-te nen an inkawm a, November ni 6 khan Dungtlang 7000 khaw Lungphun kum 30-na hawngin Dungtlang khuaah hian Vangpui Kut vawi 33-na an hmanpui nghal a ni.

Vangpui Kut hi Dungtlang Zokhuaah hman a ni a, khual-lian Robert Romawia chuan Dungtlang khua chu Mizo khaw lian hmasa a nih avangin khawvel hmun hrnag hranga Zofa-ten hlut thiam a pawimawh tih a sawi a, khawvel hmun hrang hranga Zofate insuih khawma inpawh tawn chu Zofa zawng zawng te lungkham a nih avangin hemi kawnga ṭangkai tur leh khualzin te hip nana koritu tak tur a nih avangin Mizoram sawrkar chuan khawvel hmun hrang hranga Zofate awm tamna hmun 10-ah Zo hnam chi peng hrang hrangte huapzo tur, ZoKûtpui buatsaih nan budget-ah cheng nuai 100 a dah a ni, a ti a. Heng hmun 10-a ZoKutpui hmanna tura mite pawh an phur hle tih a sawi a. Pipu sulhnu hlui tam tak awmna khua Dungtlang chu vul zel turin duhsakna a hlan a ni.

Bialtu MLA Ramthan-mawia pawhin Vangpui Kut lawmnaah hian thu a sawi a, nilengin zai leh lamin tlai lamah Vangpui Kut ruai hlim taka kilho a ni.

Tourism Minister leh MLA-te hian Farkawn chhaka Zoram leh Burma inrina Sawm-kheng Kai, |iau Lui an tlawh avangin helai vela mipui te an lawm hle a. Burma leh Zoram inkal pawhna Sawmkheng Kai Lei thawmṭhat nan Minister bakah Bialtu MLA Ramthan-mawia leh Aizawl South 3 bialtu MLA Prof.Lalnunmawia-te chuan an mimal sum thawh khawmin `12,000/- |iau kama Zofate kutah an hlân a, VC-te kaihhruainain lei thawm ṭhat hna hi an thawk nghal dawn a. Minister leh MLA-te hian Farkawna Aizawl FC Academy pawh an tlawh nghal bawk a ni.

November ni 6 vek khan Samthang, Vaphai, Leithum leh Vangchhia khuate tlawhin khawtlang hruaitute nen inkawmna an nei a, Fiaratui leh |antlang te bakah Vangchhhia khuaa Kawtchhuah Ropui leh Ralven Puk te an tlawh a. An kalna khuaahte hian khaw-tlang hruaitute nen inkâwm zel-in hmasawnna atana ruahman-na siam dan turte an sawipui a, nimin khan Khawbung Tourist Lodge an endik bakah Mizo Hlakungpui Mual an tlawh a. Khawbunga Mini Sports Complex sak mek pawh an tlawh bawk a ni. Tunhma a Selsih 7000 khua Zawlsei pawh tlawhin khawtlang hruaitute an kawm a. East Lungdara Tourist Lodge an endik bakah khawtlang hruaitute nen East Lungdar Mini Sports Complex sak lai mek pawh an tlawh bawk.

Tourism Minister hova zin te chuan Thenzawl daia Wellness Spa & Cafeteria sak mek pawh tlawhin AC khawl dah dan leh a hungna hniam lutuk siamṭha turin Contractor-te hrilh an ni a. Robert Romawia chuan khaw hrang hranga thu a sawinaah Chief Minister Zoramthanga kaihhruai sawrkar chuan inthlan dawna mipui hnena an intiamnate chu a takin a tihlawhtling chho zel a, Chief Minister leh Minister 11-te chuan mipuiin an thlan tlin chhan ang takin an department chan ṭheuhte an enkawlnaah an Manifesto chu ah kaihruaituah an hmang vek a ni, a ti.

Tourism Minister hi MLA 3 te bakah hian Tourism Director Saitluanga leh Officer dangten an ṭawiawm a ni.