Power & Electricity enkawltu Minister R.Lalzirliana chuan sawrkar hnathawk insiksawi (transfer & posting) chungchangah chuan dân anga kal mai chu thil ṭha ber a nih thu a sawi.
He thu hi nimina P&E Department hnathawkte pawl – P&E Engineering Officers’ Association (PEOA) Annual General Conference, CIRA Garden, ITI Venga buatsaih a hmanpuinaah P&E Minister hian a sawi a, R.Lalzirliana chuan Sawrkar hnathawk insiksawi (transfer & posting) chungchang a sawilannaah “Mizoram hi kan ta a ni a, khawi hmunah pawh awm theihna rilru put thiam a pawimawh a, chutih rualin hmun khata rei tak awm erawh hi thil ṭha ber a ni lova, hmun ṭha leh nuamte leh, hmun hla leh harsaa ngaihte hi angkhata hrût a, insiksawi chungchanga mi thiltithei rawihte, hotute biak ṭhat leh tlawnte leh post ṭhaa awm duh vanga thu kherhte hi thil zahthlak a ni a, mithiam tih atan a mawi lo a ni,” a ti.
R Lalzirliana chuan P&E Department hnathawh chu a langsar a, an thawh ṭhat leh ṭhat loh chu a lang nghal mai ṭhin tih a sawi a, hengahte hian Department hnathawh selna leh faknate chu anga khata ngaiin, an hnathawh-naah ṭhahnemngai leh zual turin engineer kalkhawmte chu a chah a, Minister chuan an hnathawhnaah taimaknate, rinawmnate, diknate nunpui tura chahin mipuiin an dawrna kawngah mipui aw chu dawhthei turin leh hawih-hawmna nen thinglung dam thei ang berah an mahni dawrtu te dawngsawng thiam turin a fuih bawk a. P&E Department journal, ‘Kawlphetha’ issue thar ber a tlangzarh nghal a ni.
General Conference hi an pawl President Er. Vanlal Tlana’n kaihruaiin, member thar mi 10 an lawmluh bakah an member mi 7 pension-a chhuak ta thlahna hun an hmang a. Chawhnu session ah thurel tura an chhawp-chhuahte an sawiho a ni.
PEOA hi kum 2000 khan ding ṭanin member 134 an awm mek a ni.