Nimin khan Champhai District-a Tuipui khuaah Tomato Kût hman a ni.
Kût hmanpuitu Horticulture Development Board Vice Chairman Prof. F. Lalnunmawia, MLA chuan Mizoram sawrkar-in ei leh bara intodelhna tura hma a lak meknaah thei leh thlai thar chhuahte tipunga Mizo-ram intodelhtir tumin SEDP hnuaiah Mizorama thar theite tipunga kuthnathawktute chawikang turin hma a la zel dawn a ni, a ti a. Tuipui khaw mipuite thawhrimna fakin, Tomato aṭanga ei tur thil chi hrang hrang siam chhuah zira an theihna te tipung turin a chah a ni.
Tomato Kut hman ṭan hma hian Horticulture Development Board Vice Chairman leh amah ṭawiawmtu Bialtu MLA Dr. ZR Thiamsanga hoin Official leh khawtlang hruaituten Bualpui Zau hmuna Tomato chinna hmun tlawhin Tomato rah an seng a ni.
Tuipui khuaah hian kum 2013 aṭang khan chhungkaw tlem tein Tomato an ching ṭan a, kum 2015 khan KVK Khaw-zawl chuan Arka Rakshak Variety a enchhin aṭangin a ṭhat duhzia hmuh a ni a. Kum 2016-ah Tomato Grower’s Association indinin, DRDA Cham-phaiin a kal pawhna kawng ṭha tak a sialsak a. Kum 2017 khan Horticulture Department-in hlâwk zawka thar thei tura hma lain Arka Rakshak mai bakah Arka Samrat Variety-te chin chhoh a ni a. Kumin 2019 hian tun thlenga thar tawh chu Grade A quintal 1,200 leh Grade B quintal 480 a ni a; Cheng Nuai 57 man an hralh tawh a, chhungkaw 65-in ‘zau’ hrang hrang 5-ah Tomato hi an ching mek a ni.
Kum 2017 aṭanga tun thleng hian cheng nuai 159.38 lei chhuak tawha chhinchhiah a ni a, ram hectare khatah Tomato quintal 50 – 80 vel leh kung khat zelah kg 2 – 5 thar anga chhut a ni a. Tomato thar hun pangngai ni lo, ṭhal khawro leh fur ruahtui tam lai pawhin Lo-ah hlawhtling takin Tomato a thar theih a ni a. Tuna thar chhuah Tomato-te hi Arka Rakshak variety niin, pum khat hi gram 90-100 a ni tlangpui a, ni 140-150 chhunga seng zawh hman ṭhin niin, Hectare khatah Ton 60-80 thar theih a ni.