Mizoram Tourism department chuan Delhi a hmunpui nei consultant pakhat chu uchuak taka a duhsak avangin cheng vaibelchhe 2.41 zet a luan raltir niin Comptroller and Auditor General (CAG) of India report thar ber chuan a tarlang.
Ningania chief minister Zoramthanga’n assembly dawhkana a chhawpchhuah CAG report-in a tarlan danin Mizoram Tourism department chuan Thenzawl a Integrated Development of Eco-Tourism Mega Circuit siam tura ruahman hna thawk turin Delhi a hmunpui nei Fore Consultants Private Limited chu a thlang a, sorkar laipuiin he project a rawn pawm hma kum khat zetah he consultancy firm hi a lo thlang fel daih tawh. He hna thawhna tur hian Union Ministry of Tourism chuan kum 2014 November thla khan remtihna pe-in cheng vaibelchhe 48.30 senna tura ruahman a ni a, concept paper buatsaihtu hi Fore Consultants Private Limited hi a ni. Phalna a pek rual hian he hna thawhna atana inbuatsaihna senso atan cheng vaibelchhe 2.42 chu sawrkar laipui chuan a pe chhuak nghal a, he hna hi thla 24 chhunga thawh zawh hman a, kum 2016 November a thawh zawh tura tih a ni.
Mizoram sawrkar chuan Mizoram Tourism Development Authority (MTDA) chu he hna enkawl tur (implementing agency) atana ruatin kum 2015 March thla khan hnathawhna atana sum hmahruai an dawn cheng vaibelchhe 2.42 chu MTDA kutah hlan nghal a ni a. CAG auditor-te’n an enfaihnaa an hmuhchhuah chu he hna thawh theihna atana ṭul ang zawng zawng thawk tur hian Mizoram sawrkar chuan he project pawm a nih hma kum khat aia rei, kum 2013 September thla daih tawh khan Fore Consultants Private Limited hi a lo ruat lawk tawh a ni.
Mizoram sawrkar leh he consultancy firm hian kum 2015 April thla khan inhriatthiamna thuthlung ziakin hna an thawh chhoh ang zela pawisa hi pek chhuah tura inremna siam a ni a. Inremna ziah rualin sum ruahman za zela 40, cheng nuai 96.59 pek nghal tur a ni a, hnathawhna atana pawimawh architectural leh structural design leh thildang an buatsaih fel hunah za zela 30 pe lehin a taka hnathawh a nih hunah za zela 30 dang pe leh a pek tlak tura ruahman a ni.
Mahse, MTDA hian a pek chhuah tur za zela 40 (cheng nuai 96 chuang) hi inremna an ziah ni kum 2015 April ni 24 khan pe chhuak nghalin a hnu ni 4-ah za zela 30 a pe zui leh nghal a, a tawpa pek tur pawh hemi kum vek December ni 2 khan a pe tla nghal a ni. He hna vilna atana an chan tur (consultancy fee) cheng nuai 72.42 chu hna thawh ṭan hma hauhvin pek chhuah a ni a, hei hian he company-in sawrkar aṭanga duhsakna uchuak tak a dawng tih a tichiang hle niin CAG report chuan a sawi. Hei bakah hian kum 2015 May thla khan endik hna an thawh zawh tawh thu utilisation certificate hi sorkar laipui-ah an thehlut a, mahse endik hna atana an sum dawn hi hemi kum December thla hian an dawng chauh a ni.
Hetihlai hian Finance Commission 14-na-in state tin tana sum tam zawk a pek tak avangin kum 2016 January thla aṭang khan sorkar laipui chuan hetiang hna thawh tur ruahman ang chi atana sum a pek ṭhin hi a rawn titawp ta a. Sawrkar laipuiin a rawn ngen chungin Mizoram sorkar chuan engmah an thawh chin leh ilo a thawn thlak tak loh avangin kumin January thla khan sorkar laipui chuan DPR a lo thehluh tawh chu hman theih a ni tawh lo tih hriattir ta a. Zinmite hipna atana ruahmanna lian tham tak siamna tur sum a hmuh chin cheng vaibelchhe 2.42 hi awmze nei lovin a luanraltir ta niin CAG chuan report-ah a tarlang a ni.