SSA leh RMSA zirtirtu, vawiin leh naktuk aṭanga sikul leh office kai duh lote chu sawr-kar hmalakna ring tawk lova ngaiin insawifiah tura tih an ni dawn tih School Education Minister Lalchhandama Ralte-in a sawi.
SSA leh RMSA zirtirtu intelkhawmna pawl, Federation of Mizoram Samagra (SSA/RMSA) Employees (FEMSE) in tun hnaia an hna an chawlh-san chungchangah Minister hian nimin khan Aizawl Press Club-ah chanchinbumite kâwmin, a zâwna ni 3 chhung FEMSE-in Zirna Inahte leh an office hna chawlhsana sawrkar kar nana a ruala chawlh an la thut chuan a barakhaihin pawi a ti takzet tih a sawi a.
Sawrkar-in a ngaih pawi-mawh em em zirlai naupangte hmakhaw ngai zo lova, naupang exam tikhaihlak zawnga hma laa sawrkar thu an zawm duh lo chu pawmzam harsa a tih thu sawiin, Mizoram sawrkar chuan hreh tak chungin sawrkar thu zawm lo zirtirtute chungah ‘action’ a lak a lo ṭul ta a, phalna tel lova ni thum lai an chawlh chhung zawnga an hlawh chu pek an nih loh tur thu hriattir an ni tawh a, hei bakah hian vawiin leh naktuk aṭanga sikul leh office kai duh lo chu sawrkar hmalakna ring tawk lovah ngaiin, he an hnathawh mekah hian tui tawklo leh thawk chhunzawm duh lovah sawrkarin a ngai dawn a, show cause notice pek an ni dawn tih Minister chuan a sawi a. Sawrkar thu zawm lote lo chhinchhiah a, a ṭul anga report pawh lo buatsaih turin sikul tin Headmaster, Local Council emaw Village Council emaw leh Village Education Committee (VEC)-te sawrkairn a ngen tih School Education Minister chuan a sawi bawk.
FEMSE-in sawrkar kar nana thutlukna an siam chu Chief Minister emaw, amah emaw hnenah engmah inhriattirna a awm lo tih Minister chuan a sawi a. Sawrkar thar, kum khat em pawh hun la hmang ṭha ṭhumlo chuan hun hmasa lama an thu lo thlente ngai pawimawhin an tan ngaihtuahna a sengin hma a la chho mek a; hlawh pawh mumal taka an lak theih nan theihtawp chhuah a ni, a ti a. Central sawrkarin an hlawh tur a rawn tihtlêm avangin tunah hian state sawrkarin kum khatah Cheng Vbch 27 chuang a sen belh mek zawk a. An thil phut – hlawh tihsan leh zirtirtu hna ruak zaa 70 an hauh chung-chang chu tun dinhmunah sawrkar tan tihfela han tihhlawhtlin nghal rum rum theih a nih loh avangin FEMSE pawh an nawrh titawp a, dan pangngaia kal leh tura ngenin sawrkarin a lo hriattir tawh a. SSA (Elementary)-te’n an service chungchanga Mizoram sawrkar Guwahati High Court Aizawl Bench-a an khin mek avangin Court-in a relfel hma chuan an chungchang thua hmalakna kal mek pawh sawrkar tan thutlukna engmah siam theih a ni rih lo, a ti bawk.
Hetihlai hian SSA leh RMSA hnuaia zirtirtute chuan sawrkar lakah lungawlohna lantirin mass casual leave hi an la la chhunzawm zel dawn tih an sawi a. FEMSE hruaitute chuan Zirtawpni thleng lungawilohna an lantir dawn tih an sawi a. Sawrkar an nawrnaah hian sawrkarin inbiakna neihpuiah an sawm lo tih sawiin, an lungawilohna an lantirna kawngah an pawl member tu pawhin harsatna an tawk a nih chuan an member-te thlavang hauhin na takin sawrkar an nawr zel dawn, tih an sawi ve bawk a ni.