Zothlifim Logo
Loading ...

Nilaini chawhnu dar 2 khan Serchhip District Excise & Narcotics Deptt. leh Police Deptt. te Zu man ṭhahnem tak chu Serchhip District Court-ah tihral/tihchhiat a ni.

Kumin May leh October thla inkara Excise leh Police-te zu man tihral takte hi Rakzu – 460.6 litres, BEDC – 1194 Lits., Diablo beer – 720 can, Dagon Beer – 144 can-te a ni a, heng bakah hian IML McDowell whisky half bottle – 48 leh McDowell Rum 960 bottle chu District Court hian Excise Commissioner, Aizawla thawn turin Excise kutah an dahlet leh bawk a ni.

Zu man tihralna hunah hian Chief Judicial Magistrate Ngursangzuali Sailo chuan thu sawiin, kan ramah ruihhlo hmansualna a nasa hle a, chhungkua, khawtlang leh ram min khawih buai nasa hle a ni a ti a, ruihtheihthil vangin ṭhalaite an thi nasa hle a, HIV+ pawh ruihtheih thil vangin a hluar phah hle a, hei vang hian ruihtheihthil chu do chhunzawm zel a ngai tih a sawi a. Tuna zu an tihral bakah hian Heroin mante chu sawrkarin a tihral dân tura a duan anga tihral turin Drugs Disposal Committee hnenah pek ṭhin a ni a ti bawk.

He hun hmanpuitu RK Sanghmingthanga, President, Sub-Hqrs. YMA, Serchhip chuan chhungkaw tam tak ṭap leh ruma siamtu ruihhlo tih-chhiat tur lakhawmtu Police, Excise leh YMA Branch hrang hrang chungah lawmthu sawiin, ruihhlo do kawngah nasa lehzuala ṭan lak chhunzawm zel a ṭul thu leh tun ang renga kan ram a kal zel chuan kan ram hmabak chu a ngaihtuahawm hle dawn a ni a ti a, ruihhlo tirêm tura theihtawp chhuah zel turin mitinte a sawm a ni.

He hunah hian District Court hnathawktute bakah ruihhlo mantu Excise Deptt. leh Sub-Hqrs. YMA Serchhip OB te leh thuthar lakhawmtute an tel a ni.