Ramchhung hmun dang-te rualin nimin khan Aizawlah pawh Republic Day vawi 71 na chu ropui taka lawm a ni a, Mizoram Larsap PS Shreed-haran Pillai chuan hnam puan-zar pawtpharhin parade contingent te chibai a buk a ni.
Republic Day lawmnaah hian Larsap chuan thu sawiin , mipui te chu ram inpumkhatna leh muanna chhawm nung zel tura sawmin , Mizoram chu dikna leh muanna awmna rama siam zel turin kalkhawmte a chah a, India ram chu sakhaw hrang hrang leh hnam hrang hrang te ta a nih thu a sawi a ni.
Hei bakah hian Larsap chuan State sawrkar hmalakna leh hmachhawp hrang hrang te tarlangin, Sawrkar Flagship Programme SEDP pawh , kawng hrang hranga hmasawnna thlen nan, a kaihhnawih sawrkar Department leh Board ten chak taka an bawhzui reng thu a sawi a. Kum hlui lama Sinlung Hills Council inthlan, tluang taka neih zawh tak pawh, hmasawnna chhinchhiah tlak tak a nih thu a sawi a ni.
Kumin Republic Day Ceremonial Parade-ah hian Contingent 30 an awm a, Armed Contingents pariat, unarmed contingents Pali, School Contingents sawmpali leh band party 4 ten Republic Day Parade ropui takin an entir a ni.
Armed Category-ah 46th AR, 1 Mizo Air Squadron NCC Armed leh Mizoram Home Guards te chuan Parade thiam lawmman 1-na, 2-na leh 3-na an la a. UnArmed Category-ah Pachhunga University College NCC, Ex-Servicemen contingent leh 1 Mizo Air Squadron NCC Unarmed te chuan Parade thiam lawmman pakhatna, pahnihna leh pathumna an la a. Schools contingents zingah Govt Mamawii H/S, Oxford HSS leh Springfield HSS te chuan Parade thiam lawmman pakhatna, pahnihna leh pathumna an la a bawk a ni.
Republic Day lawmnaah hian President’s Police Medal For Distinguished Service nikuma dawngtu mi 2 – RA Sanjeev, IPS, DIG (Training) leh Malsawma Royte, Dy. SP, CID (SB) te hnenah hlan a ni a, Police Medal For Meritorious Service nikuma dawngtu mi 2 – Neihchungnunga, IPS, DIG (CID) leh Lalmuanthangi, Inspector (M) Police Headquarters-te hnenah hlan a ni a, Governor’s Medal dawngtu mi 3 – SI (UB) Zirthanga Pachuau, CID, Gold Medal; SI (UB) R.Lalhmingliani, Lunglei, DEF, Silver Medal leh Constable (C/17013) Laldinpuia, Aizawl, DSB, Silver Medal-te chuan Governor hnen aṭangin lawmman an dawng a ni.