Miss Mizoram 2020-a Serchhip District aiawh tur Saizampuii

Miss Mizoram 2020 thlanna neih turah Serchhip District aiawh turin Saizampuii, Keiṭum tuna Serchhip IOC Veng-a khawsa mek chu thlan a ni.

MJA leh Zonet Cable TV ṭangkawpin Miss Mizoram 2020 thlanna an neih tura Serchhip District aiawh tur puanchhuahna hun hi January Inrinni tlai khan Serchhip-a I&PR Conference Hall-ah neih a ni a, he hunah hian MJA Serchhip District President, C. Ramengmawia chuan Miss Mizoram 2020 thlanna neih turah Serchhip District aiawh tur hian Saizampuii hi thlan a nih thu hi a puang a ni.

Serchhip District aiawha Miss Mizoram thlanna a tel tur Saizampuii (Zampuii) hi Laldailova (L) leh Lalsangliani-te fa neihchhun niin Keiṭum khua an ni a, thiamna lamah BSc. (Agri) niin tunah hian Serchhip District Agriculture Office-a FOCUS hnuaiah thawkin Serchhip IOC Veng-ah a khawsa mek a ni.

Zampuii hi zirna leh hna-thawhna avangin Keiṭum aiin hmundang ah a khawsa tam zawk a, St. Paul’s HSS aṭangin HSLC leh HSSLC a zo a, hemi hnu hian Assam Agriculture University, Jorhat, Assam-ah zir chhunzawmin, kum 2018 khan B.Sc (Agri) hi a zo a, tunah hian Competitive exam awm ang angte hmachhawn ve turin a inbuatsaih mek a ni.

Zampuii hi Jorhat-a College an kal lai hian kum 2014 khan an College Miss atan an thlang tawh a, kum 2016 khan Jorhat-a College hrang hrang zirlaiten a huho-a Annual Festival an hman ṭumin College hrang hrang aiawhte nen an inelnaah Miss atan thlan a lo ni tawh bawk a, Tribal zinga he title la hmasa thei ber a ni nghe nghe a. Amah hi ft. 5.7-a sang a ni.

Inrinni-a Miss Mizoram Serchhip District puanna ah hian MJA Serchhip District Vice President, Kapliana Pachuau chuan inlawmna thu sawiin, MJA Serchhip District-a General Secretary, C.Lalrochhuanga chuan report pein Serchhip District aiawha Miss thlanna a tel tur, Saizampuii chanchin sawina hun a hmang a nei a, MHIP Sub-Hqrs. Serchhip President, Sanghmingliani chuan Sash bah tirin Tiara a khimtir nghal a, Serchhip DIPRO, K.Saitluanga chuan lawmthu sawina neiin hun a khar a, he hunah hian Serchhip District MJA member-te leh Saizampuii ṭawiawmtute bakah YMA, MHIP, MUP, MZP, MSU leh Serchhip Photographers’ Association aiawhte an tel a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram