National Immunisation day (IPPI) pualin Mizoram hmun hrang hranga naupang kum 5 hnuailam te hnenah nimin aṭang khan Oral Polio Vaccine (zenghri danna) pek an ni.
National Immunisation day pual hian nimin zing khan Serchhip District chhunga (zeng hri danna pek) Intensified Pulse Polio Immunisation Programme 2020 hawnna inkhawm tawi chu Serchhip District Hospital tualah neih niin, District Bawrhsap Dr. Lalzirmawia Chhangte, IAS chuan khuallian niin a hawng a, hawnna inkhawm tawi buatsaihah District Bawrhsap chuan kan hamṭhatna tura sawrkarin min buatsaihsakte hi a hlawhtlin theih nan ram mipuite kan pawimawh ṭhin a. Vawiina Zeng hri danna vaccine te pawh hi a la tura ruat naupang kum 5 chin hnuai lam zawng zawngten kokim taka an lak ngei a pawimawh a, zeng natna vei hnua inenkawl tum ai chuan tuna lo invên lawk hi a ṭha zawk hle a ni, a ti a. District chhunga he vaccine la thei chinten kim taka an lâk vek theih nan khawtlang hruaitute, tlawmngaipawl leh nu leh pate chu thawhpuiah a sawm a ni. Thu a sawi zawhah District Bawrhsap hian vaccine pein he IPPI Programme hi a hawng nghal a ni.
IPPI Serchhip district hawnna inkhawm tawi hi Dr. Laldawngliana Sailo, Chief Medical Officer chuan a kaihruai a, zeng hri chu India ram aṭanga ûmbo a nih tawh thu leh, kan ram ṭhenawma a la awm avanga invên zui zel nana vaccine-te chu kalpui zel a nih thu a sawi a. District chhung khaw tinah Booth siam niin, nimin zing aṭang khan pek ṭan an ni a, ASHA-te, Anganwadi Worker-te leh Health Department thawktute ṭanghovin a dawng tur naupangten kim taka an dawn ngei nan ruahmanna siam a nih thu a sawi a ni.
He hunah hian Dr. ZD Lalmuanawma, Medical Superintendent, Dr. Lalhlunpuii, DIO leh thawktu dangte, media mite leh vaccine la tur naupang te an tel a ni.