Governor-in C.Kamlova lawmpuina hlân

Governor PS Sreedharan Pillai chuan kumin Republic Day a Padmashree Award dawngtu C.Kamlova, Salem Veng, Aizawl a cheng mek, Hindi-a thuziaktu leh Mizorama Hindi ṭawng zirna kawnga thawh hlâwk tak chu a hlawh-tlinnaah Raj Bhavan-ah a lawmpui a, lawmpuina thuziak bakah tangkafai a pe a ni.

Governor chuan C.Kam-lova chu a hnathawh ṭhatte Rastrapati Bhavan-in lo hriat saka an chawimawi chu thinlung takin a lawm pui tih a sawi a. A hlawhtlinna chu Mizo mipui zawng zawngte hlawhtlinna leh hmingṭhatna ni a ti a. Padma-shree chawimawina dawng phak hi India ram state dangah te an ngai hlu hle a, hetiang lawmman dawngphak mi chhuan-awm tak tak Mizo ten an nei chu inchhuanna chang an hriat a, a dawngtute ngaihsanna chang pawh an hriattel a a ngai a ni a ti. C.Kamlova rawngbawl-naah hian Hnam inpumkhatna atana ṭangkai tak Hindi zirtirna chu Mizoramah a hlawhtling chho ṭan mek tih a sawi a, a thuziak te chhunzawm zel tur leh Hindi ṭawnga Mizo Literature pawimawh te dah kawngah theihtawp chhuah chhunzawm turin a chah a ni.

C.Kamlova pawhin a theih ang tawka Hindi Literature huanga Mizote tan hmahruaitu zinga a tel thei chu vannei a in tih thu a sawi a. Hindi hmanga hnam inpumkhatna kawngah a theih anga hma lak chhunzawm zel a tum thu a sawi a. C.Kamlova hian Governor hnenah a lehkhabu ziak 4 leh a hlaphuah 2 a pe bawk a ni.

C.Kamlova hi kum 1948, November 17 khan Mampui khua, Lawngtlai District-ah a piang a. Eizawnna lamah Hindi Zirtirtu hna a thawk ṭhin a, thuziak lama tuimi a ni a, Mizo ṭawnga Thu leh Hla te Hindi a dah kawngah a thawhhlawk hle a. Kum 1995 khan MBSE in mawhphurhna a pek angin Class VI Zirlaibu “Zoram Bharti” a siam a. Kum 2000 khan thumal 29,000 chuang awmna Hindi-Mizo Dictionary chu kum 4 chhung a buaipui hnuin a chhuchhuak a. He Dictionary hi Ministry of Human Resource Development chuan ṭha tih em avangin National Honor Award a hlan a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram