Higher & Technical Education Minister Dr. R. Lalthangliana’n Mizoram University (MZU) Southern Campus chu academic session tharah zirna kalpui turin bul tan ni se a duh thu a sawi a, hemi atana mamawh Temporary Campus atan Mizoram Engineering College, Pukpui chu hman theih a nih a beisei thu a sawi bawk.
Nimina MZU Southern Campus din dan tur chungchang sawrkar hotute leh MZU hotute’n an sawihonaah Minister chuan MZU Southern Campus din thuai tura sawrkar laipui phalna la tura pawimawh hmasa ber pahnih – ram pekna lehkha leh temporary campus hman tur a awm thu chu a rang thei ang bera tihfel a nih tur thu sawiin, Mizoram sawrkarin a tih tur ang ang chu a ti nghal dawn a ni a ti. Chief Minister Zoramthanga pawhin a phurpui hle a ni tih sawiin temporary campus luah tura Mizoram sawrkarin a tih la ngai, campus panna kawng siam, tui leh electric pek leh staff transit accommodation sak chungchang pawh Cheng vaibelchhe 11 senga tih tum mek a nih thu a sawi bawk.
Sawihonaah hian MZU Vice Chancellor Prof. K.R.S. Sambasiva Rao-a chuan Southern Campus chu hmathlir thui tak nei chunga bul ṭan a pawimawh tih sawiin hmunhma ṭha leh zau ṭha tak an mamawh dawn a, a rang thei ang berin ram pekna ‘Land Allotment’ lehkha leh Campus sak fel a nih hmaa course kalpuina turah hma lak ni nghal thuai se a duh thu a sawi.
Mizoram University Southern Campus dinna tura ruahman, Pukpui awmna bialtu MLA Vanlaltanpuia chuan Pukpui Village Council hotuten lawm taka ram acre 100 aia zau an pek phal nghal phal thu sawiin, Tanhril-a MZU din a nih dawna a thlawna ram pe nia insawi si a, zangnadawmna phuttute avanga buaina tawh ang chu a awm loh a beisei thu leh an fimkhur thu pawh a sawi a ni.
Mizoram University hotute chuan MZU Southern Campus tihhlawhtlin nan theihtawp an chhuah dawn thu leh hemi rual hian sawrkar laipuiin dan zawm tur a siamte an zawm ngei ngei a tul thu an sawi a, hmabak thui tak a la awm thu an sawi bawk.