Innovative Challenge on Business Solution on SDG Serchhipah nei

Entrepreneurship Development Centre (EDC) Mizoram leh Planning & Programme Implementation Department, Govt. of Mizoram ṭangkawp buatsaihin Govt. Serchhip College-ah Innovative Challenge on Business Solution to Sustainable Development Goals neih a ni a, C.Lalramzauva, Adviser to Chief Minister, Mizoram chuan khuallian niin a hmanpui a ni.

Khuallian C.Lalramzauva chuan kan ram hi ṭha tak leh ṭangkai taka kan hman atana Pathianin min duan sak a ni a, a chhunga cheng mipuite hmasawnna ngaihtuah chu sawrkarin a tum ber a ni, a ti a. College zirlaite chu hmasawn-na tur tam tak a awm thu leh mi la tih ngai loh thil thar hmu-chhuak tura ṭanlâk nachang hre turin a fuih a, kan ramah hmasawnna ngelnghet alo awm zel theihna tura mithiamte zirtirna chu hlâwk taka hmang turin duhsakna a hlan bawk.

Lalchhuanawma Hrahsel, Chief Consultant, SDG chuan Sustainable Development Goals ṭobul sawiin, khawvel ram hrang hranga hmasawnna hnathawh kalpui avanga kan sik leh sa leh khawvel lo la awm zel tur (Future Generation) ten an tawrh theih (Global Warming)-te sawiin, chutiang ang zawng nilova hmasawnna ngelnghet leh tlo tak tak a lo awm zawk theihna tura SDG 17 Goals-in a tum hrang hrangte a sawi a. Truth Chuauthang-puii, Co-ordinator, Entrepreneurship Development Centre (EDC) Mizoram hnen aṭangin EDS Presentation thlirho a,ngaihthlak a ni bawk.

He hun hman a nih chhung hian District chhung khaw hrang hranga eizawnna lama harsatna awm theite zawn chhuah a, an harsatna chinfelna atana ruahmanna insiamsiak turin inelna buatsaih a ni dawn a, he inelnaa tiṭha zual tan lawmman a siamsak dawn bawk a ni.

He hun hi Lalremsiama, Principal, Govt. Serchhip College chuan a kaihruai a, Serchhip-a Entrepreneur lam tuimite, Govt. Serchhip College zirlaite leh thawktute an tel a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram