Tunhnaia Serchhip khawpui chhung kawngpui (NH-54) khuar chhe lai hnawh nana lei hman chu Inrinni khan New Serchhip North VC-te chuan an huam chinah hnawh an phalsak lova, hetihlai hian Serchhip khawpui chhunga NH-54 siamṭha tura Sub-Hqrs. YMA Serchhip hmalakna kal zelah kawngpui hi bitumen (alkatra) hmanga siamṭhat thuai a ni dawn niin hriat a ni.
NH-54 khuar zual lai hnawhṭhat hna (patch repairing) hi Serchhip hmar lam aṭangin thawh ṭan a ni a, New Serchhip North an thlen hnuah a thawktu contractor chu a inhnukdawk nia sawi a nih avangin kawng siamṭhat hna thawh chu chawlhsan a ni a.
Hemi hnu hian Zirtawpni khan Dardengi hmawng bul aṭangin hmar lam hawiin kawng khuar hnawh hna hi thawh ṭan leh a ni a, amaherawhchu kawngpui hnawh nan hian bitumen (alkatra) hmang lovin lei hman a ni a, Inrinni khan hmar lam hawiin thawh chhunzawm zel a ni a, amaherawhchu mipui phun thawm a nasa hle a, New Serchhip North VC-te chuan lei hmanga kawngpui hnawhtute hnenah hian an area chinah chuan an duh ve loh thu leh an area chhunga kawng khuarte chu lei hmanga hnawh ve lo turin an hrilh a, hei vang hian kawngpui hnawh hna thawktute pawhin an an chawlhsan zui ta a ni.
Hetihlai hian Sub-Hqrs. YMA, Serchhip president RK Sanghmingthanga leh Sub-Hqrs, YMA-a Vigilance and Monitoring Committee hruai-tute chuan hemi chungchang-ah hian nimin tlai dar 3 khan Sub-hqrs. YMA president chenna in-ah NHIDCL leh an hnuaia contractor Gammons company hotute chu inkawm-hona an neihpui a, he hunah hian Company lam chuan tuna kawng an repair dân chu an siam tum dan a ni lova, emergency atan chauha ti an nih thu an sawi a, mahse complaint a awm avangin an chawlhsan nghal tih an sawi a ni.
Sub-Hqrs. YMA hruaitute chuan kawng chhia chu a pangngai anga siam turin an ngen a, company lam chuan hnathawktu (labour) an neih loh thu sawiin, labour nei se chu vawiin (10.2.2020) aṭanga bitumen (alkatra) nena siamṭha nghal turin an inpeih reng tih an sawi a, amaherawhchu International Paragliding Accuracy Championship leh K|P General Conference hmaa siam zo tur chuan an labour neihin a tlin lo tih sawiin, midang chah tur chuan thla 1 vel hun a duh dawn tih an sawi a, a rang thei ang bera an siam zawh theih nan YMA te chu hlawhfa zawnpui turin an ngen nghal a, hlawhfa an hmuh theih chuan hna chu ṭan nghal mai an inpeih reng tih an sawi bawk a ni.
He an inbiakna bawhzui hian nimin tlai khan Sub-Hqrs YMA hruaitute chuan kawng siamnaa hlawhfa tur hi an zawng nghal a, Serchhip khawchhung kawng chhia chu a rang lama siam thuai a nih theih nan hma an la zel tih an sawi a ni.