Categories
Chanchinthar Mizoram Serchhip

Mizoramah Coronavirus la lut lo; Thu diklo vawrh darh vangin FIR thehluh tum

Khawvel pum huapa hrileng mek, Novel Coronavirus chuan Mizoram a la rawn lut lo tih Health & Family Welfare Department chuan an sawi a, hetihlai hian Ser-chhipa International Paragli-ding Accuracy Championship, Serchhipa neih tura tel tur Chinese pilot-in Coronavirus kai anga thu diklo vawrh darh chungchangah FIR thehluh tum a ni.

Coronavirus chung-changah hian nimin khan thuchhuah siamin Health & Family Welfare Department chuan Kerala-a mi pahnihah a hrik hi hmuh ni tawh mahse thihpui an la awm lova, he hrileng hian Mizoram a la rawn lut lo a ni, an ti a. Novel coronavirus hrileng hi WHO chuan Public Health Emergency of International Concern (PHEIC)-ah puang tawhin tunah hian ram 27-ah he hri hi kai awm mahse China bikah a vei an tam ber a, mi 16,831-ah a hrik hi hmuh tawh a ni a, thi erawh mi 362 chauh an la ni, an ti.

Mizoram sawrkar chuan theihtawp chhuahin he hrileng laka invêng tur leh do lêt turin theihtawp a chhuah reng tih pawh sawiin, thla hmasa ni 30 khan Health Minister Dr.R.Lalthangliana hovin State Level Meeting pawh neih a ni a, meeting-ah chuan Task Force din a ni a, he Task Force hian hmalak ṭulna apiangah hma a la chho ṭan mek a ni. Sawrkar laipui lama coro-navirus hrileng buaipuitute nen pawh nitin inbe pawpin hmalakna report-te pawh thawn ṭhin a ni a. Lengpui Airport-ah ram dang aṭanga khualzin lo lut, a bikin China aṭanga lo kalte chu ngaihven zual bik an ni, Health Deptt. chuan an ti a.

Mizoram sawrkar chuan Lengpui Airport bakah hian Zokhawthar lamah pawh khualzin endik hna thawk chho mekin, a ṭul angin hmun dangahte pawh hma lak zel a tum a, State Level Task Force bakah District tinah Coronavirus hrileng a awm palh pawha lo hmachhawn turin District Task Force din tura hmalak a ni an ti a, sawrkar chuan thuthang nazawng avanga mipuite chiai lo turin a ngen a, social media lama mi pahnih, dah hrana awm mek nia sawite pawh hi an dam loh vang ni lovin, fimkhur thuhlaa pawn chhuak rih lo tura tih mai an ni, an ti.

Hetihlai hian nimin khan social media-ah Serchhipa International Paragliding Accudacy Championship 2020 neih tura lo kal, Chinese pilot-in coronavirus a kai ngei tih finfiah a ni ang leh Falkawn lama phur thla anga thuthang awm chu thu diklo a ni tih Serchhip District Medical Superintendent Dr. ZD Lalmuan-awma chuan a sawi a, hemi rual hian Mizoram Aero Sports Association Sub-Hqrs, Serchhip president, C.Lalhminghlua chuan China aṭanga pilot lo kal turte hi Coronavirus avanga India pan tur thlawhtheihnate cancel a nih avangin tun ṭumah chuan Chinese pilot te chuan an lo kal theih loh tur thu MASA hnenah an hriattir tawh tih a sawi a, nimin khan pilot lo thleng an la awm loh thu a sawi bawk a ni.

Hetianga International Paragliding Accuracy Championship mipuiin an hlutna tihniam thei tur ang zawng leh mipui tichiai thei tur ang zawnga thuthang diklo vawrh darh a nih chungchangah hian Organising Chairman, Robert Romawia Royte, Tourism leh Sports changtu minister ni bawk thurawn angin MASA Gen. Hqrs. hruaitute chuan FIR thehluh an tum tih Zothlifim-in a zawh chiannaah nizan khan MASA Sub-Hqrs. Serchhip president chuan a sawi bawk a ni.

By Editor

C.Lalrochhuanga,
New Serchhip, Serchhip - 796181
Mizoram
Contact: WhatsApp | Phone Call | Telegram