Dr. Lalzirmawia Chhangte, IAS, District Magistrate chuan Serchhip district chhunga vawk lakluh khapna thupek a chhuah.
District Magistrate thupek chhuahah chuan District AH & Vety Officer, AH & Vety Department, Serchhip District hnen aṭanga lehkha a hmuh angin tunlai hian Mizoramah vawk hri, Porcine Reproductive and Respiratory Syndrome (PRRS) leng a la reh lo nia rinhlelh a ni tih a sawi a, hemi hri leng avanga Serchhip District mipuite tan buaina/harsatna a thlen loh nan, Section 144 CrPC hmanga khapna thupek chhuah chu thil ṭul tak, tih loh theih lohah a ngaih avangin Section 144 CrPC 1973 in thuneihna a pek angin, ṭhenawm ram (neighbouring states/country) leh District dang aṭanga vawk leh vawksa aṭanga thilsiam reng reng lakluh khap tlat a ni tih thupek a chhuah a ni.
He thupek hian thu leh awm hma chu thupek chhuah ni (19.2.2020) aṭanga thla 2 chhung a huam dawn a, he thupek zawm lo chu Section 188 IPC dan hmangin hrem theih an nih thu leh he thupek hian sawrkar aṭanga phalna neite a huam loh thu a tarlang bawk.