Nimin chawhma dar 10:30 khan DC Conference Hall, Serchhipah Mizoram State Day, 2020 lawmna hun District Bawrhsap Dr. Lalzirmawia Chhangte, IAS hova neih a ni.
District Bawrhsap chuan thusawiin, Mizoramin State dinhmuna kan ram hlankai anih hriatreng nan February ni 20 hi State Day tiin sawrkarin ni pawimawhah a puang a, Mizoram State nih champha lawm leh ani thei chu Pathian hruaina a ni a, tiin, lawmthu a sawi a. MNF leh India sawrkar inremna, Memorandum of Settlement chu ni 30.6.1986-ah ziah niin, chu inremna chu Mizoram chu UT ni tawh lova, State puitling a nih tawh tur thu a ni a, tichuan, ni 20.2.1987-ah The Constiution (fifty-third Amendment) Act 1986 angin Mizoram chu State puitling a lo ni ta a ni, a ti a. Mizoram chuan state a nih hnuah hlawkna tam tak a nei a, Mizo thalaite zirna lama khawvel tukhverha an dahchhuah ve na tur Mizoram University kan nei te, Inrema thuthlungin chiang taka a tarlan angin chimral kan nih loh nana kan inhungbikna tur Inner Line Regulations hman a ni ta zel te chu thil chhinchhiah tlak tak a nih thu a sawi bawk.
Dr. Lalzirmawia Chhangte chuan India ram chhunga sawrkar inrelbawlna neih san theih ber, State dinhmuna Mizoram a ding chu a lawmawm hle a, hei bak chu beisei tur a awm chuang lo a ni, tiin, State nihnain hamṭhatna tam tak a pek rualin mawhphurhna tam tak a keng tel a, ramin hma a sawn zel theih nan mipuiten an mawhphurhna chu puitling taka an hlenchhuah a ṭul a, sawrkar chu mipuite ta, mipui rawngbawltu a ni a, mipuiten ral thlir mai lovin, neitu rilru pua sawrkar ṭawiawm tlat zawk turin mipuite a sawm bawk a ni.
He hun hi C.Lalduhzuali, MCS, SDO (S) Serchhip chuan a kaihruai a, State ni pawimawh tak lawmna huna kal sawrkar hnathawkte chu sawrkar laka kan rinawmna tilangtute an ni a, lawmawm a tih thu a sawi a, Samuel Zodinsanga, MCS, SDC chuan lawmthu sawina hun hmangin he hun hi khar a, he hunah hian Serchhipa sawrkar hnathawkte, tlawmngai pawl hruaitute leh thuthar lakhawmtute an tel a ni.
Kum 1986 June 30 khan India sawrkar leh Mizo National Front (MNF) te chuan inremna thuthlung, Mizoram Peace Accord tia hriatlar chu an ziak fel a. He inremna anga tihhlawhtlin tur a nih angain Mizoram chu kum 1987 February 20 khan Union Territorry atangin State puitlingah hlankai a ni