Thu diklo thehdarh vangin FIR thehlût

International Paragliding Accuracy Championship 2020 February ni 12 leh 16 inkara Serchhip a neih turah Chinese tel turte zingah Coronavirus vei an awm nia thuthang chungchang avangin Aizawl Vaivakawn Police Station-ah FIR thehluh a ni.

International Paragliding Accuracy Championship 2020 Organizing Committee chuan Social media-a he thu thehdarh hi thu diklo a ni tih sawiin, he thil thleng hi Organizing Committee chuan pawi a tih thu leh heng thuthang diklo hi mipui tichiai thei leh he Championship hming tihliau thei nia an ngaih bakah ram pahnih inlaichinna thleng pawha thil pawi thei a nih avangin thu dik lo thehdarhtute zawnchhuah an nih theih nan FIR thehluh a ni tih an sawi.

IPAC 2020 hi karleh, ni 12-16 February khian neih a ni dawn a, heta tan hian inpuah-chahna tluang takin a kal zel a, mipui a duh apiang he Championship en tur hian a sawm a, a duh tan pawisa chawiin Para-gliding – Joyride a tih theih dawn a, Chuanhnuai aṭanga Zawlpui thleng chuan man hi Rs.2,000/- a ni dawn a, video thla la duh tan Rs.2,500/- a ni ang a, chuan manah hian Zawlpui aṭanga Chuanhnuaia lêt lehna lirthei chuan man a tel nghal dawn a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram