Categories
Chanchinthar Mizoram Serchhip

Tuichangral South Group YMA rorel inkhawm N.Vanlaiphai-ah neih a ni

Nimin khan N. Vanlaiphai Community Hall, Bangla Veng Branch, N.Vanlaiphaiah Tuichangral South Gr. YMA Rorêl Inkhâwm Vawi 4-na neih a ni a, YMA khawih agenda panga (5) leh sawrkar khawih agenda pakhat rêl a ni.

Rorêl Inkhawmah hian YMA member 180 chuang an kalkhâwm a, nizan lamah hun an hmang chhunzawm bawk.

Tuichangral South Group YMA Rorêl Inkhêwm hi Bangla Veng Branch YMA, N.Vanlaiphaiin thlengin, H.Lalhmunsanga, President-in a kaihruai a, an thurel zingah Chekawn – Artahkawn – N.Vanlaiphai kawng chu a rang thei ang bera siam a nih vat theih nan Tuichangral South Group YMA-in hma la rawh se, tih a tel a. Hei bakah hian Tuichangral South Group YMA Golden Jubilee chu ruai nen lawm nise an ti a, mitthi an awmin an thih cham kar khatna a, awmni kham ang maia hun hman ṭhin chu tihtawp a nih theih nan Group YMA-in hma la rawh se tih te, Tuichangral South Group huamchhunga branch hrang hrangten Ruihhlo do kawngah tun ai nasa zawkin hma lak ni rawh se tih te, Tuichangral South Group YMA huamchhungah Kumpuan ‘Zirna Uar Kum’ a hma la ṭha Branch hnenah lawmman pek ni rawh se tihte a tel a ni.

Rorel inkhawm hi R.Sanghmingthanga, President, Serchhip Sub-Hqrs. YMA leh a thawhpuiten an hmanpui a, nizan lamah N.Vanlaiphai Community Hall-ah hun hman chhunzawm a ni.

Vanlalhlua Chhangte, Secretary report aṭanga a lan dânin, Tuichangral South Group YMA huamchhûngah YMA Branch 19 awmin, Joint YMA 2 a awm mêk a. YMA member 9870 (mipa 5682 leh hmeichhia 4188) awmin, Life Member 206 an awm mêk bawk.

Kum 2022 Tuichangral South Group YMA Rorêl Inkhâwm chu Khawlailung Branch-in an thleng dâwn a ni.

By Editor

C.Lalrochhuanga,
New Serchhip, Serchhip - 796181
Mizoram
Contact: WhatsApp | Phone Call | Telegram