Mizo Zirlai Pawl, Mizo Students Union, Student Self Support Union leh Aizawl City College Joint Students Union hruaitute chuan nimin khan Mizoram Cooperative Apex Bank Ltd Chairman, T.Lalmuanpuii chu a Pisa ah hmuin, tunlaia YES Bank buaina leh a kaihhnawih chungchangah zirlai scholarship la ten harsatna an tawh loh dan tur an sawipui.
Apex Bank Chairman T.Lalmuanpuii chuan zirlai hruaitute hi Reserve Bank of India-in YES Bank chunga khuahkhirhna a lek avanga zirlai zinga Scholarship hmu lo an awm loh tur thu a sawi a, zirlai loan rulh tum tak takte chu engtik lai pawh a loan pek an inhuam thu a sawi bawk a ni.
Yes Bank hi Payment Gateway (Cheque Clearing leh Mizoram pawna RTGS/NEFT hmanga pawisa thawnna)-ah India ram hrang hrang Bank 40 (North East a Bank 14) ten an thawhpui a nih thu sawiin, Apex Bank pawhin Yes Bank hi a thawhpui thu a sawi a. Yes Bank-in harsatna a tawh mek chu chinfel thuai a nih a beisei thu a sawi a, Mizoram Cooperative Apex Bank Ltd. in RTGS/NEFT hmanga pawisa inthawnna atana Yes Bank alo hman ṭhin chu hman a remchan rih lo avangin RTGS/NEFT hmanga pawisa thawnna atan IFSC dang, HDFC0CMCABL an hman avanga pawisa inthawnna leh zirlaite scholarship account-a dah luh chungchangah buaina tur a awm lo a, zirlaite lo buai lo turin a chah a ni.