Kumina Aizawl Municipal Corporation inthlanna neih turah Ward paruk hmeichhiate tan hauhsak a ni a, hengte hi ward III, Ward VIII, Ward X, Ward XIV, Ward XVI leh Ward XIX te a ni.
AMC-a hmeichhe ward tur thlanna hi nimin khan State Election Commission kaihhruaina hnuaiah Aizawl ah neih a ni a, Commissioner thar, Laima Chozah chuan COVID-19 hri lengin ram a tihbuai avangin Inthlan hun tur hi sawi lawk theih nilo mahse Hmeichhia te tana seat hauhsak thlanna chu a dan pangngaia tih a ṭul avangin nimin khan he hun hi buatsaih a ni a ti.
AMC Ward 19 atangin Ward 7 tun thlenga hmeichhia te tana la hauh loh atangin Ward 6 thlan dan tur ruahmanna SEC chuan a siam a, Ward 7 atanga Ward 6 te chu MHIP leh MUP President te; Aizawl DC; Joint Secretary UD&PA, Municipal Commissioner, AMC leh Deputy Secretary GAD ten Ward hming 7 ziah lawksa aṭangin an pawt a ni.
Kumina AMC Inthlanna atana Hmeichhia te chauhin an chuh theihna tur Municipal Ward 6 te chu –
Ward III – Ramhlun North, Ramhlun Venglai, Ramhlun Vengthar, Ramhlun Sports Complex leh Laipuitlang
Ward VII – Armed Veng, Armed Veng South leh Chite
Ward X – Chawnpui, Zotlang, Zonuam leh Govt. Complex
Ward XIV – Khatla, Khatla South leh Mission Vengthlang
Ward XVI – Bethlehem, Bethlehem Vengthlang leh College Veng
Ward XIX – Kulikawn, Tlangnuam, Saikhamakawn, Melthum leh South Hlimen
Ward V – Chanmari, Zarkawt leh Electric Veng chu pawhfuh a ni ve lova, he Ward hi AMC inthlan lehah Hmeichhia te tan hauh a ni dawn a ni.
AMC term kallai mek hi kuminah a tawp dawn avangin kumin kum tawp lamah AMC Inthlanna hi neih beisei a ni.