Aizawl khawpuia Assam Rifles an chhuak thuai dawn a, February thlaa chhuakfel vek turin kan nawr:CM

Chief Minister Zoramthanga chuan Aizawl khawpuia Assam Rilfles-te chu an chhuak thuai dawn tih sawiin, Covid-19 vanga an insawn tur a khaihlak avangin February thla hian chhuakfel vek tura nawr an nih thu a sawi.

Nimina Ramhlun South YMA Hall-a AMC Ward No IV MNF Campaign hawnna leh Manifesto tlangzarhna hun a hmanpuinaah Chief Minister leh MNF party president ni bawk, Zoramthanga chuan he thu hi sawiin, Assam Rifles-te chu February 2021 chhungin Zokhawsanga pêm vek turin nawr an nih thu leh, za rual vel an insawn tawh thu a sawi a, AR hotute pawhin phei an duh tawh hle a, an inbuatsaih mek tih a sawi a, “Keini sawrkar lam pawh kan inbuatsaih mek a, Aizawl mai ni lo, Mizoram hmun danga kan ram min chhuhtu sipaite pawh ûmchhuah vek kan tum a. Hei hi Prime Minister leh Union Home Minister pawh ka sawipui tawh,” a ti bawk.

Chief Minister chuan, “Kan sawrkar hnuah MP inthlan kan nei a, election code of conduct-in rei tak min phuar a. A hnuah Covid-19 a lo lang leh a, kan sawrkar hnathawh tak tak hi thla 8 chauh a la niin ka hria,” tiin, MLA inthlanah khan ZPM-ten kohhran unit-a hmang-in chief ministerial canditate hial an nei a. Mahsela Pathianin MNF tan hun a ruat avangin sawrkar ngelnghet kan siam a, By-election, VC/LC, LADC inthlanah MNF an chak hle tih a sawi a. Chief Minister chuan, “Serchhip Bialtu Lalduhoma erawh chu a che over deuha dan a bawhchhiat avangin ‘Ekdom ZPM’ a nih phah ta a nih hi,” a ti a. MLA aṭanga bân a nih chuan Court-a kal tum kha tunah mipui Court an ti leh a, tunah hian pawl sawn nasa Duhoma leh ZPM chu mipuiin an hrechiang tulh tulh a, an tlachhe tulh tulh niin a sawi.