Covid-19 inkaihhruaina hman mek thlakdul hret dawn

Nimin khan SAD Conference Hall, MINECO-ah Health Minister Dr. R.Lalthangliana kaihhruaiin Mizoram Covid-19 dinhmun thlirhona (review meeting) neih a ni a, Covid-19 vanga inkaihhruaina hman mek chi hrang hrangah inthlahdul hret rel a ni.

Nimina ṭhukhawm chuan Mizorama Covid-19 dinhmun uluk taka an thlir hnuah February thla aṭang chuan Pathianni chhun inkhawm leh Inrinni chhun Sabbath inkhawm chu neih ṭan tawh nise ṭha an ti a, heng inkhawmah hian Ministry of Home Affairs-in inkaihhruaina a siam zawmin ṭhutna awm zat (seating capacity) chhûta 50% emaw, mi 200 aia tam loah a tlêm zawk zawk tel theih a ni ang.

Class X leh Class XII Board exam turte tan January ni 22, 2021 aṭang class kal chhunzawm tura rel a ni bawk a, Board exam turte tan Hostel-a luh phalsak an ni bawk a, amaherawhchu RAgT test paltlang vek an nih a ngai thung a. Hemi chungchanga inkaihhruaina kimchang chu State Executive Committee on Disaster Management in ruahmanna an siam ang.

Nimina thurel zingah Mizoram pawn aṭanga lo lûtte swab sample test sak dan leh quarantine dan ruahmanna siamṭhat a tel a, Health & Family Welfare department-in a kalpui dan tur ruahmanna an siam dawn a ni.

Meeting-ah hian chhiatni ṭhatnia mihring kal phalsak chin pawh tihpun rel a ni a, zan curfew pawh thlahdul ṭha tih a ni a. Aizawl khawpui chhunga lirthei tlan dan pawh thlak tur a ni a, sumdawnna hmun bakah Hotel, picnic spot, gym leh infiamna hmunhma hman dan chungchanga inkaihhruaina pawh thlahdul hret rel a ni. Inkaihhruaina thar hman ṭan hun leh kalpui dan tur kimchang hi State Executive Committee on Disaster Management in a duang dawn a ni.

Thla khat kalta (15.12.2020 – 14.1.2021) chhung khan Mizoramah Covid-19 positive 267 hmuhchhuah an nih thu leh an zinga 137 (51.31%) chu Mizoram pawn aṭanga lo lut an nih thu tarlan a ni a, heng zinga 25 chu Mizo an ni a, 112 hi Mizo ni lo civil mi an ni at, 45 hi Paramilitary Forces an ni.

Meeting-ah hian Home Minister Lalchamliana, School Education Minister Lalchhandama Ralte, I&PR Minister Lalruatkima, MOT Chairman Dr. ZR Thiamsanga, MLA, Chief Secretary bakah Sawrkar department hrang hrang hotute an tel a, Mizoram University, Mizoram kohhran Hruaitute Committee, Jt. NGO Coordination Committee leh Indian Medical Association aiawhte an tel bawk.

Leave a Reply

This site uses Akismet to reduce spam. Learn how your comment data is processed.