Kawngpuiin Myanmar lamah Saisihchhuah thleng; Mizoram lamah Pangkhua chauh a la thleng

Myanmar leh India ram pahnihte insumdawn tawnna leh inkalpawhna tur atana kawngpui pawimawh chu ṭhenawm ramin an laih tlang tawh laiin, Mizoram lam kawngpui erawh ṭha taka laih tlang a la ni lo.

Nimin khan State Planning Board Vice Chairman H.Rammawi chuan a pisa-ah thuthar lakkhawmtu ṭhenkhat-te kawmin he thu hi a sawi a, H.Rammawi chuan Mizoram lam aṭangin Burma lam thleng turin kawngpui hian Saisih-chhuah hi a la thleng lo niin a sawi a. Mizoram lam kawngpui hian Pangkhua chauh la thlengin, Myanmar lam chuan Saisihchhuah thleng an laih tlang tawh bakah, kawng hi lai tlang saltiah man ni loin, kawngpui hi zau deuh niin, kawngko sang deuhah a min tur venna terrace ṭha tawk an siam thu a sawi.

H Rammawi chuan, MNF-in sawrkarna an chelh hun hmasa lamah he kawng hi a ngaih pawimawh avangin Pangkhua aṭanga Saisih-chhuah panna kawng laih ṭan tuma hmalak niin, kawng laih tlangna tur atan hian BAPD hnuaiah cheng vaibelchhe 13 hmuh a ni a; mahse, PWD khan laih an hreh avangin pioneer-in laih an tum mek laiin sawrkarna a inthlak a, Congress sawrkar khan rang mangkhengin RD aṭangin an lai a, kawng chu laih tlang nimahse cheng vaibelchhe 13 han senna atan chuan a grade a ṭha tawk lo nia a ngaih thu a sawi bawk.

Saisihchhuah leihlawn dawh chungchang pawh sawiin, H.Rammawi chuan India leh Myanmar sawrkar inremna siamah Saisihchhuah lei dawh tur chuan India kuta dah a nih thu a sawi a, Mahse, he inremna hi India external affairs ministry remtihnain Mizoram sawrkarin Myanmar kutah hlan chhawngin clearance pek a nih hnuah, tunah hian Saisihchhuah lei dawh turin Myanmar-in hma la nghalin, khawl engkim an inchhawp nghal thu leh engineer-te nen an awmchilh tawh niin a sawi a. “Mizoram Chief Minister Zoramthanga nena nikum January thla khan kan sawiho hnuah, September ni 30, 2020 khan engkim clearance pek a ni,” H.Rammawi chuan a ti.

H.Rammawi chuan Border Road Organisation (BRO) kuta awm Siaha leh Lawngtlai inkara Kawlchaw lei pawh kum 11 chhung dawh a ni tawh a, hnathawh zawh hleih theih loa a awm thu leh, Hnahthial bul Tuipui D-a Darzokai lei pawh hi tun thlengin ban pakhat pawh an la dawh loh thu a sawi a. Saisihchhuah lei pawimawhna hi Zohnahthlak insuihkawm rilru hian an ruihchilh tawp thu te, khawchhak leh khawthlang inpawhna tur hi feeling an nei nasa lutuk a, inzawmna kawngpui tur a nih avanga an ngaih pawimawh thu a sawi bawk.